РФ сенатора, биир дойдулаахпыт Егор Борисов үбүлүөйдээх сааһыгар анаммыт, улуус баһылыга Степан Саргыдаев көҕүлээһининэн тэриллибит икки күннээх дьыалабыай оонньуу түмүктэннэ. Уопсайа 49 кыттааччы 7 хамаандаҕа арахсан, бырайыактары оҥорон көмүскээтилэр.
“Биһиги Чурапчы туой буорун үөрэтэн, анаалыстаан, бизнес-бырайыагы оҥордубут. Туойунан тротуар билиитэтин, бордюру, кирпииччэни, дьиэ муостатыгар керамическай билиитэни оҥоруохха сөп диэн толкуйдаатыбыт. Бырайыакпытыгар экология өттүн, үлэ миэстэтин таһаарыыны, үбү киллэрии курдук бары хайысхатын үөрэттибит, суоттаатыбыт”, — диэн кыайыылаах хамаанда хамандыыра Дьулустан Говоров кэпсиир.
Кыайыылаах хамаанда ноутбугунан наҕараадаланна. Иккис миэстэни Айталина Пугачева хамандыырдаах “От күөхтэр”, үһүс миэстэни Анастасия Сивцева хамандыырдаах “Кыһылллар” хамаандалара ыллылар.
“Сүрдээх үчүгэй бырайыактары иһиттибит. Пластик иһиттэри уонна Чурапчы туойун булкуйан тутуу матырыйаалларын оҥоруу, түргэнник ситэр бройлеры иитиинэн дьарыктаныы, нэһилиэнньэҕэ тиэрдэн биэриигэ дроннары туһаныы, улахан техникэлэри өрөмүөннүүр сервиһи арыйыы, байыаннай дьайыыттан кэлбиттэргэ реабилитациялыыр киини тэрийии, бэйэбитигэр үүнэр отоннортон утахтары оҥоруу, эко-агротуризмы тэрийии курдук бырайыактары билиһиннэрдилэр.
Ил Дархаммыт Айсен Николаев Егор Афанасьевич этиитин өйөөн, манна кыттыбыт түөрт чаҕылхай ыччаты өрөспүүбүлүкэ кадровай резервнэй фондатыгар ылыахтара. Онон ыччаттарга бу суолталаах иһитиннэрии көҕүлүүр күүһү биэрдэ”, — диэн улуус баһылыга Степан Саргыдаев иһитиннэрэр.
Елена Макаринская