Кэнники сылларга социальнай хантыраак үгүс тыа сирин дьонун баҕа санаатын толорон, бэйэ дьыалатын арыналларыгар, дьарыктаах буолан дохуот киллэринэллэригэр бигэ тирэх буолла. 2023 сылтан Ил Дархан Айсен Николаев сорудаҕынан быһаччы оҥорон таһаарыынан уонна кэтэх хаайыстыбанан дьарыктанааччыларга социальнай хантыраак суумата үрдээбитэ.
Быйыл улууспутугар социальнай хантыраакка 9 мөл. 48 тыһ. солк. көрүллэн, алын дохуоттаах 26 дьиэ кэргэн өйөбүлү ылан, бэйэ дьыалатын арыннылар. Кэтэх хаһаайыстыбанан дьарыктанааччыларга 5 мөл. 478 тыһ. солк. көрүллэн, 15 дьиэ кэргэн туһанна. Бу сылтан үлэлээбэт, саҥа биэнсийэҕэ тахсыбыт уонна доруобуйаларынан хааччахтаах дьоҥҥо анал бырагыраама үлэлээн, 13 киһи хамыыһыйаны ааһан, 5 мөл. солк. кэриҥэ суумаҕа хантыраак баттастылар. Бу туһунан социальнай харалта салайааччыта Лидия Тосукаева иһитиннэрэр.
Бүгүн, сэтинньи 3 күнүгэр, Чурапчы нэһилиэгэр социальнай хантыраак өйөбүлүнэн «Аартык» диэн саҥа автосервис үөрүүлээх быһыыга-майгыга аһылынна. Хаһаайын Станилав Барашков – Чурапчы төрүт олохтооҕо, элбэх оҕолоох дьиэ кэргэн аҕата. Кини бу иннинэ Чурапчы, Дьокуускай, Владивосток икки ардыгар таксиһынан үлэлээн кэлбитэ. 2019 сылтан, баҕа санаатын толорон, автосервис тутуллуохтаах оннун бэлэмнээн, матырыйаалын ылынан, Владивостоктан туттар малын-салын, оборудованиетын тиэйэн саҕалаабыта. 2023 сылга кулун тутарга социальнай хантыраак хамыыһыйатыгар бырайыагын көмүскээн, 350 тыһ. солкуобайга хантыраак баттаспыта.
Үөрүүлээх дьаһалга саҥа уораҕай ичигэс, бигэ акылааттаах буоллун диэн Чурапчы улууһун бочуоттаах олохтооҕо, спорт бэтэрээнэ, ытык киһибит Семен Морфунов алгыс тылын түһэрдэ.
Барашковтар дьиэ кэргэн бүгүҥҥү үөрүүлээх күннэригэр улуус социальнай харалтатын салайааччыта Лидия Тосукаева, Чурапчы нэһилиэгин дьаһалтатын сүрүннүүр исписэлииһэ Мария Матвеева, «Мой бизнес» киин сэбиэдиссэйэ Ольга Монастырева уонна чугас дьонноро, аймахтара, доҕотторо кэлэн ыалдьыттаатылар, истиҥ эҕэрдэлэрин тиэртилэр.
“Чурапчыбыт нэһилиэгэр хас түөлбэ ахсын автосервис баар буолла. Бүгүн бу «Маарыкчаан» түөлбэҕэ киэҥ, сырдык автосервис аанын аста. Станислав Владимирович социальнай хантыраак хамыыйатыгар хаста да киирэн, хамыыһыйаттан аккаас ылан, хаһыс эрэ төгүлүттэн бырайыага өйөбүлү ылан, хантыраак баттаспыта. Бу курдук туохтан да иҥнибэккэ, инниҥ диэки баран ис, үгүс киһи астына сылдьар үчүгэй үлэлээх-хамнастаах улахан тэрилтэ буола улаатыҥ”, — диэн Лидия Тосукаева баҕа санаатын эттэ.
“Бүгүн биһиги нэһилиэкпитигэр үөрүүлээх күн, ол курдук сэттэ түөлбэбититтэн биир улаханнарыгар «Маарыкчаан» түөлбэҕэ «Аартык» диэн саҥа автосервис аһыллыбыта барыбытын үөрдэр. Билиҥҥи сайдыылаах үйэҕэ хас биирдии киһи атах тардыстар, үлэлиир-хамсыыр тимир көлөлөөх. Бу тиэхиньикэлэрбитин оҥосторбутугар-көрүнэрбитигэр маннык тэрилтэлэр аһыллан үлэлииллэрэ олус наадалаах, дьоҥҥо-сэргэҕэ туһалара үгүс. Эһиэхэ үлэҕитигэр-хамнаскытыгар үрдүк ситиһиилэри, дьиэ кэргэҥҥитигэр дьолу-соргуну баҕарабын”, — диэн Мария Матвеева эттэ.
Барашковтар дьиэ кэргэн үөрүүлэрин үллэстэн, кэлбит ыалдьыттары минньигэс аһынан-үөлүнэн күндүлээтилэр.
“Бүгүн биһиги баҕа санаабыт туолан автосервиспыт аһылынна. Үс буоксалаах, тиэхиньикэни көтөҕөр оборудованиелаах, дьаамалаах. Кэлэн массыынаҕытын диагностикалатан өрөмүөннэтиҥ”, — диэн Станислав Владимирович ыҥырар, автосервис Аартык уулусса 17 аадырыгар үлэлиир. Баҕа санаата туоларыгар төһүү күүс буолбут судаарыстыба көмөтүгэр — социальнай хантыраагы туһанан махтала улаханын этэр.
Саҥа автосервис үлэтэ таһаарыылаах, үгүс махталлаах килийиэннэрдээх буоллун. Ити курдук, социальнай хантыраак тыа сирин дьоно баҕа санааларын толороллоругар, бэйэ дьыалатын арыналларыгар, кэтэх хаһаайыстыбаларын сайыннаралларыгар улахан өйөбүл-көмө буолар.
Людмила ГОРОХОВА, ааптар хаартыскаҕа түһэриитэ, видеоҕа устуута.