А.А.Саввин аатынан Чурапчытааҕы история уонна этнография түмэлигэр өрөспүүбүлүкэтээҕи, улуустааҕы «Маарыкчаан» коллекционердар түмсүүлэрин чилиэнэ, кыраайы үөрэтээччи Семен Иванов «Өбүгэлэрбит иччилээх маллара…» тус быыстапкатын үөрүүлээх аһыллыыта буолла.
Үөрүүлээх тэрээһиҥҥэ улуус коллекционердара, Семен Семенович чугас аймахтара, бииргэ үлэлээбит, алтыспыт дьоно-сэргэтэ кыттыыны ыллылар. Улуустааҕы култуура салалтатын начаалынньыга Петр Гуляев быыстапка аһыллыбытынан эҕэрдэлээн туран, «Чурапчы улууһун култууратын уонна искусствотын сайдыытыгар кылаатын иһин» бэлиэни Семен Ивановка туттарда.
Быыстапкаҕа 11-с үйэтээҕи манньыаттартан саҕалаан былыргы симэхтэр, таҥаралар мөссүөннэрэ уонна да атын сэдэх маллар бааллар.
Семен Семенович мунньуу алыбыгар кыра оҕо эрдэҕиттэн үлүһүйбүтүн маннык сэһэргээтэ:
— 4-с дуу, 5—с дуу кылааска үөрэнэр кэммэр оскуолабыт таһыгар мас олордуутугар субуотунньук буолбута. Оччолорго интэринээт томторугар эргэ педучилище дьиэлэрэ бааллара. Ол эҥэр үлэлээбиппит. Арай, мас олордоору сири хаспыппар былыргы көһүлүөк көстөн кэлбитэ. Ылан аспыппар, толору үрүҥ көмүс манньыаттаах, эриллибит кумааҕы харчылардаах этэ. Дьиэбэр тиийэн, тута төрөппүттэрбэр көрдөрбүппүн ылан ууран кэбиспиттэрэ. Онтон ылата айылҕаҕа таҕыстахпына, оттуу да бардахпына, уопсайынан араас сирдэринэн кэллэҕим-бардаҕым аайы былыргы өтөхтөрү интэриэһиргээн киирэн көрөр буолбутум. Оннук сылдьан араас булумньулары булан, кэллиэксийэм кэҥээн барбыта.
Ити курдук ураты дьарыктаах биир дойдулаахпыт олус интэриэһинэй быыстапкатын тохсунньу 31 күнүгэр диэри тиийэн көрөргүтүгэр ыҥырабыт.
Марфа Петрова.