Балаҕан ыйын 13 күнүгэр «Айылгы» норуот айымньытын дьиэтигэр ССРС култууратын туйгуна, СӨ култууратын үтүөлээх үлэһитэ, РФ Суруналыыстарын сойууһун чилиэнэ, Чурапчы улууһун уонна Болугур нэһилиэгин Бочуоттаах олохтооҕо, «Гражданскай килбиэн» бэлиэ хаһаайката, улууспут култууратын сайдыытыгар сүҥкэн кылааттаах Валентина Дмитриевна Пинигина төрөөбүтэ 80 сылын көрсө киниэхэ анаммыт «Валентина Пинигина. Истиҥ, иһирэх тылынан…» диэн саҥа кинигэ сүрэхтэниитэ ыытылынна. Кинигэни СӨ култууратын үтүөлээх үлэһитэ Айталина Смирникова хомуйан оҥордо, Борис Павлов салайааччылаах «Көмүөл» издательскай кииҥҥэ таҥыллан Новосибирскай куоракка бэчээттэнэн таҕыста.
Дьоро күҥҥэ Валентина Дмитриевна дьиэ кэргэнэ, аймахтара, бииргэ үлэлээбит үөлээннээхтэрэ, уһуйан таһаарбыт ыччаттара, улуус, нэһилиэктэр салалталара, култуура эйгэтин үлэһиттэрэ муһуннулар. Манна кэлбит хас биирдии киһи ахтыылары хомуйан, сааһылаан кинигэ оҥорон таһаарбыт Айталина Михайловнаҕа, бэйэтин издательствотыгар таҥан бэчээккэ ыыппыт Борис Ивановичка ис сүрэхтэриттэн махтаннылар уонна истиҥник, иһирэхтик, сылаас тылларынан Валентина Дмитриевнаны аҕыннылар.
Видео:
Наталья Сибирякова (сиһилии «Саҥа олох» хаһыат ВКонтакте ситимигэр уонна Rutube Чурапча live ханаалыгар ааптар видеотун көрүҥ).