Бүгүн о.э. ахсынньы 1 күнүгэр үөрүүлээх быһыыга-майгыга, киэһэ 16 чааска “Кыһын Саха сириттэн саҕаланар” бэстибээл чэрчитинэн, Чурапчы нэһилиэгэр, аныгылыы оҥоһуулаах Ленин аатынан болуоссакка Саха сиригэр биир бастакынан Саҥа Дьыллааҕы харыйа уоттарын 1500 кэриҥэ киһи көрөн турдаҕына уматтылар.
Халлааммыт анаабыт курдук туран биэрдэ, дьон-сэргэ Саҥа Дьылы чугаһатар сэргэх тэрээһини көрөөрү тымныы, чэбдик салгыҥҥа тоҕуоруһа муһунна. Бүтүн дьиэ кэргэнинэн, оҥой-соҥой көрбүт кырачааннардыын сүргэлэрэ көтөҕүллэн, уруйдаан-айхаллаан харыйа уота уматыытын үөрэ көрүстэ.
Быйыл Чурапчыга 16 миэтэрэ үрдүктээх харыйа туруорулунна, 144 дьэрэкээн оонньуур итиэннэ 850 миэтэрэ усталаах гирлянда ыйанна. Манна барытыгар нэһилиэк Иван Кандинскай аатынан “Айыллаан” култуура киинин үлэһиттэрэ күүскэ үлэлээтилэр.
Бу кэмҥэ, остуоруйа сүрүн дьоруойдара, Чысхаан оҕонньор сиэнэ кыыс Хаарчааналыын, “Чурапчы нэһилиэгэ” тыа сирин түөлбэтин баһылыга Владимир Сивцев бар дьоннорун кыһын кэлбитинэн, саргылаах Саҥа Дьыл чугаһаабытынан эҕэрдэлээтилэр.
Сэмэн Жендринскэй. Ааптар хаартыскаҕа түһэриитэ
Наталья Сибирякова видеота