Сэтинньи 10 күнүгэр Дойду үрдүнэн – Полиция үлэһиттэрин күнэ бэлиэтэнэр. Бу күн иитинэн, Чурапчытааҕы ис дьыала уорганын үлэһиттэрэ, быйыл үһүс төгүлүн уһуйаан уонна оскуола үөрэнээччилэрин ортотугар “Профессия — полиция” уруһуй күрэҕин улуустааҕы “Радость”оҕону сайыннарар киин үлэһиттэрин кытары көҕүлээн ыыттылар.
Полиция үлэһиттэрин уопсай үөрүүлэригэр итиэннэ соһуйууларыгар, улууспут араас нэһилиэктэриттэн 300-тэн тахса үөрэнээччи уонна оскуолаҕа киириэн иннинээҕи саастаах оҕолор кыттыыны ылбыттар.
Тэрээһин үөрүүлээх чааһыгар, Чурапытааҕы полиция отделын начаалынньыга, полиция подполковнига Иннокентий Свинобоев, полиция начаалынньыгын солбуйааччы, подполковник Петр Сивцев, “Радость” оҕону сайыннарар киин тэрийэр үлэҕэ исписэлииһэ Алина Собакина, полиция майора Саргылана Никифорова кыттыыны ыллылар.
“Быйылгы дьыллаахха хаһааҥҥытааҕар даҕаны элбэх оҕо кыттыыны ылла, ити биһигини олуһун үөрдэр. Бу аата биһиги талбыт идэбит нэһилиэнньэ ортотугар туһалааҕын бэлиэтэ диэн сыаналыыбыт. Кыайыылаах оҕолор уруһуйунан үлэлэрэ отделбыт көрүдүөрүгэр сыл устата ыйанан бар дьон көрүүтүгэр туруохтара”, — диэн Иннокентий Дмитриевич эттэ.
Петр Романович полиция үлэһиттэрин үлэлэрин сүрүн сыалын, быйыл оскуоланы бүтэрэр выпускниктарга полиция идэтигэр үөрэтэр үөрэх кыһаларын тустарынан уонна Чурапчы улууһугар полиция отдела тэриллибит устуоруйатыттан кылгастык сырдатта.
“Радость” оҕону сайыннарар киин аатыттан, бу уруһуй куонкуруһун улууска эрэ буолбакка өрөспүүбүлүкэ таһымыгар ыытарга этии киирдэ, итиэннэ киин салалтата отдел үлэһиттэрин сайыҥҥы “Кустук” лааҕырга ону таһынан араас куттал суох буолуутугар туһуламмыт аахсыйалары оҕолор ортолоругар ыыталларыгар махтанан туран эҕэрдэ суруктары туттарда.
“Профессия-полиция” кыайыылаахтары билиһиннэрдэххэ
1-кы степеннээх лауреаттар
- Уйгулаана Суздалова (Кытаанах);
- Сати Никутова (“Радость”);
- Дуолан Павлуцкай (“Радость)”;
- Давид Пудов (“Кыталык” уһуйаан).
2-с степеннээх лауреаттар
- Виолетта Федорова;
- Туйгууна Григорьева;
- Аня Нестерева (Сылаҥ);
- Арина Попова;
- Арылхан Беляев (Түөйэ);
- Николь Захарова.
3-с степеннээх лауреаттар
- Катя Артемьева;
- Эрсан Баишев;
- Динара Макарова;
- Аман Корякин;
- Вика Адамова.
“Радость” номинаннара
- Иван Павлов аатынан Чурапчы орто оскуолатын 4 “б” кылааһын үөрэнээччилэрэ Зарина Сивцева уонна Игорь Иванов буоллулар.
1-кы степеннээх дипломаннар
- Дьулуур Попов (“Кэскил” уһуйаан);
- Валя Ефремова (“Мичил” уһуйаан);
- Алина Тимофеева (Бахсы);
- Амелия Мордускина;
- Гена Игнатьев (Соловьев).
2-с степеннээх дипломаннар
- Эрсан Смирников (Чурапчы орто оскуолата);
- Аман Захаров (Чурапчы орто оскуолата);
- Никита Новгородов (“Кэскил” уһуйаан);
- Арысхаан Неустроев.
3-с степеннээх дипломаннар
- Айталыына Сергеева;
- Дамир Посельский;
- Айсан Салгынов.
Семен Флегонтов аатынан Хадаар оскуолатын 5 кылааһын үөрэнээччитэ Амелия Мордускина: “Кылааспыт салайааччыта Лидия Ивановна Лукина этиитинэн биэс буоламмыт кыттарга санаммыппыт. Бэйэм үлэбэр боростуой харандааһы кытары маркердары, хара фламастеры туһанным. Уруһуй куонкурустарыгар наар кыттыыны ылабын оттон бу күрэххэ аан бастакыбын холоннум. Инникитин худуоһунньук буолар баҕа санаалаахпын”.
Одьулуун орто оскуолатын 11 кылааһын үөрэнээччитэ Туйгууна Григорьева: “Бу куонкурус туһунан салайааччыбыт Алевтина Тарасовнаттан истибиппит. Үлэбэр ручканы итиэннэ акварель кырааскаларын туһанным, оскуолабытыттан үһүө этибит. Инники идэбин медицинаны кытары сибээстиэхпин баҕарабын ол иһин биология, химия предметтэригэр кыһаллан бэлэмнэнэбин, фармацевт идэтин баһылаан дойдубар кэлэммин үлэлиэм”.
Семен Новгородов аатынан Чурапчы орто оскуолатын 1 кылааһын үөрэнээччитэ Аман Захаров: “Таас оскуолаҕа үөрэнэбин, ол онно баар (диэн хоту диэки ыйар). Учууталым Лара Петровна уруһуйдуохха диэбитэ. Полициялар Чурапчыны охраналыыллар, полицескай диэн күүстээх уонна үчүгэй киһи. Улааттахпына полицейскай эбэтэр дпс буолуом. Үөрэхпэр үчүгэйбин, математиканы сөбүлүүбүн”.
Анастасия Старостина аатынан Түөйэ оскуола-уһуйаанын 2-с кылааһын соҕотох үөрэнээччитэ Арылхан Беляев: “ “Дядя Степа” диэн уруһуйбунан кытынным, соҕотоҕун үөрэнэбин. Учууталым Наталья Николаевна. Улааттахпына тустуук буолуохпун баҕарабын, эһиил Дмитри Коркин аатынан интернат-оскуолаҕа киириэм”.
Куонкурус түмүгүн кэнниттэн улахан кылаас үөрэнээччилэрэ полиция отделын иһинэн тэриллибит мусуой хоһугар ыалдьыттаатылар.
Сэмэн ЖЕНДРИНСКЭЙ. Ааптар хаартыскаҕа түһэриитэ