Чурапчыга оскуоланы мэтээлинэн бүтэрбит оҕолору чиэстээтилэр

Быйыл улууспут оскуолаларын 225 оҕо бүтэрэн, олох киэҥ аартыгар үктэннилэр. Олортон бастыҥтан бастыҥнарын, үөрэххэ уһулуччу ситиһиилэрин иһин кыһыл уонна үрүҥ көмүс мэтээли ылбыт 19 выпускнигы чиэстээтилэр.

Кыһыл көмүс мэтээлинэн С.К. Макаров аатынан Чурапчытааҕы гиманзияттан Андрей Васильев, Алаҕартан Александр Говоров, Мугудайтан Айталина Данилова уонна Хатылыттан Анна Кривошапкина бүтэрдилэр.

 

Үрүҥ көмүс мэтээл хаһаайыннарынан С.К. Макаров аатынан Чурапчытааҕы гимназияттан Айыына Барашкова, Айсен Ефремов, Сандаара Керемясова, Галина Сергеева, Сардана Сивцева, Юлия Тимофеева, Бахсыттан Алеся Аммосова, Хатылыттан Влада Гаврильева уонна Милена Холмогорова, И.М. Павлов аатынан Чурапчы орто оскуолатыттан Кристина Дьячковская уонна Иосиф Феофанов,  Кытаанахтан Саина Лазарева, Хадаартан Олеся Орлова, Дириҥтэн Айгыына Посельская, Д.П. Коркин аатынан Чурапчытааҕы спортивнай интэринээт оскуолаттан Алексей Кривошапкин буоллулар.

Улуус баһылыга Степан Саргыдаев, үөрэх салалтатын начаалынньыга Юрий Посельскай  оҕолору эҕэрдэлээтилэр, инники олохторугар анаан кэс тылларын эттилэр.

Төрөппүттэр ааттарыттан эҕэрдэ тылы Кытаанах оскуолатын төрөппүтэ Татьяна Лазарева эттэ. Кини учууталларга, улуус салалтатыгар махталын биллэрдэ. Урукку сылларга мэтээлинэн бүтэрбит, билигин улуус дьаһалтатын ыччаты кытары үлэҕэ сүрүннүүр исписэлииһинэн үлэлиир Александра Хомус оҕолорго талбыт идэлэрин баһылаан, төрөөбүт-үөскээбит дойдулара сайдарын туһугар үлэлии-хамсыы кэлэллэригэр ыҥырда.

Андрей Васильев, кыһыл көмүс мэтээл хаһаайына, С.К. Макаров аатынан Чурапчытааҕы гимназия бастыҥ выпускнига:

  • Быйыл оскуолабын бүтэрдим. Үөрэнэр кэмнэрбэр техническэй предметтэри – математиканы, физиканы ордук сөбүлүүрүм, онон биир кэлим эксээмэннэрбэр бу предметтэри туттарбытым. Үөрэппит учууталларбар, төрөппүттэрбэр бу ситиһии кэлэригэр күүс-көмө буолбуттарыгар махтанабын. ХИФУ инженернэй-техническэй үнүстүүтүгэр туттарса сылдьабын, тутааччы-инженер буолуохпун баҕарабын. Идэ ылан, дойдум туһугар үлэлииргэ-хамсыырга бэлэммин!

Елена Макаринская