Чурапчыга “Мохсоҕол” байыаннай-ыспартыыбынай оонньуулар быйылгы кыайыылаахтара – “Улыбка” уһуйаан (Фоторепортаж)

Бүгүн о.э. олунньу 20 күнүгэр XVI-с төгүлүн Чурапчы улууһун уһуйааннарын икки ардыларыгар “Мохсоҕол” улуустааҕы байыаннай-ыспартыыбынай күрэхтэһии Дойдуга Дьиэ кэргэн, Саха сиригэр Оҕо саас, улууска Ыал саргыта, Афганистан сэриитэ түмүктэммитэ 35, Ленинград блокадатыттан босхолонуу 80 сылларыгар уонна Аҕа дойдуну көмсүкээччилэр күннэрин көрсө  ыытылынна.

Үгэс быһыытынан, сыл аайы Аҕа дойдуну көмүскээччи күнүн иннинэ буолар бу күрэхтэһиигэ уһуйаан улахан бөлөхтөрүн  уолаттара, кыргыттара кытталлар. Итиэннэ, Чурапчыга Александр Федотов аатынан успуорт уораҕайыгар нэһилиэктэртэн 15 хамаанда — 150 оҕо кэлэн күрэхтэстэ.

 

“Мохсоҕол” байыаннай-ыспартыыбынай күрэхтэһиини көҕүлээччинэн, тэрийээччинэн Чурапчытааҕы “Кэскил” уһуйаан буолар. «Кэскил» уһуйаан оччотооҕу физкултуураҕа инструктора Ольга (Слепцов) Ложкина уонна уһуйаан методиһа Анна Шарина бырайыак оҥороннор, бу күрэхтэһиигэ  маҥнай Чурапчы сэлиэнньэтин иһинээҕи уһуйааннар кыттыбыттара, онтон кэлин улуустааҕы үөрэх управлениета  биһирээн, улуус үрдүнэн ыытыллар буолбута. Этиллибитин курдук, быйыл 16-с сыла.

Күрэхтэһии былааҕын, былырыыҥҥы оонньуулар кыайыылаахтара Чурапчы нэһилиэгин “Чуораанчык” уһуйаан хамаандата көтөхтүлэр. Хамаандалары, тэрийээччилэри күрэхтэһии саҕаламмытынан истиҥник эҕэрдэлээн, улуустааҕы үөрэх управлениетын дошкольнай үөрэхтээһин салаатын кылаабынай исписэлииһэ Маргарита Оконешникова, Чурапчы улууһун Бочуоттаах олохтооҕо, саппаас майора Семен Никитин, Чурапчытааҕы оҕо сайдар киинэ “Кэскил” уһуйаан сэбиэдиссэйэ Надежда Федорова, бойобуой дьайыы бэтэрээннэрэ Александр Саввин, Олег Сивцев эҕэрдэ тыл эттилэр.

Күөн көрсүһүү I түһүмэҕэр строевой көрүү, II түһүмэҕэр эстафета (9 түһүмэхтээх моһоллору туорааһын: эрийэ-буруйа сүүрүү, “мышеловка”, “дулҕанан сүүрүү”, бэрэбинэ устунан сыыллыы, өрө-таҥнары сүүрүү, “аппаны ойуу”, сыал ытыыта, хороон иһинэн сүүрүү) буолла. Тыҥааһыннаах, интэриэһинэй киирсии кэнниттэн «Мохсоҕол-2024» ХVI улуустааҕы байыаннай-ыспартыыбынай оонньуу уопсай түмүгэ таҕыста.

Икки түһүмэх түмүгүнэн кыайыылаах хамаандалар:

I – “Улыбка” Чурапчы;

II – “Кэскил-1” Чурапчы;

III – “Мичил” Чурапчы.

“Бастыҥ хамандыыр”

I —  Арсен Нестеров, “Сулусчаан” Сылаҥ — Бойобуой дьайыылар бэтэрээннэрин түмсүүтүн бирииһэ;

II — Рамир Сивцев, “Туллукчаан” Чурапчы;

III — Эрхаан Ядрихинский, “Кэскил-1” Чурапчы.

“Бастыҥ байыаннай пуорма”

I – “Кэскил-2” Чурапчы;

II – “Улыбка” Чурапчы;

III – Хайахсыт нэһилиэгин уһуйаана.

“Устуруойдаан хаамыыга”

I – “Улыбка” Чурапчы;

II – “Кэскил-2” Чурапчы;

III – “Мичил” Чурапчы.

“Моһоллору туорааһын”

I – “Улыбка” Чурапчы;

II – “Чуораанчык” Чурапчы;

III – “Кэскил-1” Чурапчы.

Бастаабыт хамаанда кубогынан, грамотанан, хас биирдии чилиэнэ мэтээлинэн, анал бириистэринэн наҕараадаланнылар. Уол оҕону иитиигэ туһуланар дьаһал быйылгы XVI сыллаах тэрээһининэн, улуус, нэһилиэк аҕаларын, эр дьоннорун, бойобуой дьайыы бэтэрээннэрин Сэбиэтин уопсастыбаннай түмсүүлэрэ кытыннылар, анал бириистэри туруордулар.

Сүрүн судьуйанан улуустааҕы үөрэх управлениетын иитэр үлэҕэ отделын сүрүн исписэлииһэ Эрэл Аммосов үлэлээтэ. Дьүүллүүр сүбэҕэ Кындал оскуола-уһуйаанын дириэктэрэ Михаил Копылов, Семен Новгородов аатынан Чурапчы орто оскуолатын “Беркут” байыаннай-патриотическай кулууб салайааччыта Дмитрий Соловьев, “Кэскил” уһуйаан иитээччитэ Оксана Сысолятина, Иван Павлов аатынан Чурапчы орто оскуолатын патриотическай үлэҕэ исписэлиис, улуус мунньаҕын дьокутаата Дмитрий Попов олордулар.


«Мохсоҕол» күрэхтэһии уол оҕону төрөөбүт дойдуну таптыырга, харыстыырга, кинини көмүскээччи,  араҥаччылааччы тыыныгар иитэринэн ураты суолталаах. Улахан күрэхтэһии улууспут үөрэҕин управлениетын иһинэн үлэлиир «Боотур Уус сыдьааннара» бырайыак иитинэн салаллар.  Бу күрэххэ оҕолор бэйэлэрин бэлэмнэрин, кыайыыга дьулуурдарын көрдөрөллөр,  саастыылаахтарын кытта кыахтарын тургутуһаллар. Физкултуурунай салайааччылар уопуттарын атастаһаллар, сатабылларын көрдөрөллөр. Курэхтэһэр хамаанда ахсаана сылын ахсын эбиллэ, кыттааччытын бэлэмэ тупса, хаачыстыбата үрдүү турара, бииртэн-биир, саҥаттан-саҥа хамаанда кыайыыны ситиһэрэ, «Мохсоҕол» күрэхтэһии туруоруммут сыалын—соругун таба тутуһан иһэрин  туоһулуур. Итиэннэ биһиги күрэхпитигэр наар күүс-көмө Аҕа настаабынньыкпытыгар Семен Никитиҥҥэ, бойобуой дьайыы бэтэрээннэрин Сэбиэтигэр, улууспут, нэһилиэкпит эр дьонун түмсүүлэригэр дириҥ махталбытын тиэрдэбит”, — диэн “Кэскил” уһуйаан сэбиэдиссэйэ Надежда Егоровна эттэ.

Сэмэн Жендринскэй. Ааптар хаартыскаҕа түһэриитэ