Сылгы иитиитэ сахаларга биир сүрүн уонна төрүт салаа буолар. Мээнэҕэ саханы Күн Дьөһөгөй Айыы таҥаралаах норуот диэхтэрэ дуо?! Былыр-былыргыттан саха олоҕун укулаата, ону кытта култуурата, үгэстэрэ Дьөһөгөй оҕотун кытта ыкса ситимнээхтэр. Ол курдук сылгыны иитии норуоппут төрүт үгэһинэн буолар. Сылгы уонна сылгыһыт, саха норуотун дьылҕатыгар уһулуччу суолтатын бэлиэтээн, 2016 сыллаахха анал ыйааҕынан кулун тутар 21 күнүн Сылгыһыт күнүнэн биллэриллибитэ.
Тэрээһиҥҥэ улуус баһылыга Степан Саргыдаев, улуус баһылыгын тыа хаһаайыстыбатыгар солбуйааччы Анжелика Неустроева, Чурапчы нэһилиэгин баһылыга Владимир Сивцев, Хоптоҕо нэһилиэгин баһылыга Алексей Бурцев, Мугудай нэһилиэгин баһылыга Николай Аммосов, күрэхтэһии сүрүн судьуйата Иван Оконешников кыттыыны ыллылар. Бу күн сылгыһыттар күрэхтэрэ, “Дьөһөгөй оҕотун дьоһун киэргэлэ” куонкурус, хомуур хапсаҕай, ат сүүрдүүтэ, атыы-эргиэн дьаарбаҥката тэрилиннилэр.
«Өрөспүүбүлүкэбит бастакы Ил Дархана Егор Борисов сылгыны үөрдээн иитиигэ, сайыннарыыга уонна кэҥэтиигэ соруктаах ыйаахха илии баттаан турар. Чурапчыбыт улууһугар күн-бүгүн сылгынан 10 кээпэрэтиип ол иһиттэн 4 плекменной кээпэрэтииптээхпит ону таһынан 197 бааһынай хаһаайыстыба сылгынан дьарыктанар. Өрөспүүбүлүкэ үрдүнэн Чурапчы улууһа сылгы ахсаанынан бастакы миэстэҕэ иһэбит, тохсунньу 1 күнүнээҕи дааннайынан 16.921 төбө бэлиэтэммитэ. Түгэнинэн туһанан бары сылгыһыттары тыа хаһаайыстыбатын управлениетын аатыттан итиитик-истиҥник эҕэрдэлиибит», — диэн Анжелика Петровна эттэ.
Улууспутугар сэттис төгүлүн ыытыллар сылгыһыттан күрэхтэригэр Мугудай, Одьулуун, Хоптоҕо (икки хамаанда), Болтоҥо нэһилиэгиттэн хамаандалар илин-кэлин түһүстүлэр. Манна Хоптоҕо нэһилиэгин 1-кы хамаандата 8 мүн. 5 сөк бириэмэни көрдөрөн 1 миэстэ буолары ситистэ уонна бу муус устарга Үөһээ Дьааҥыга ыытыллар сылгыһыттан өрөспүүбүлүкэтээҕи күөн күрэстэригэр кытта барар путевканы, айан ороскуотун сабар гөрүүчэй сэртэпикээтинэн наҕараадаланнылар. 2-с миэстэ буолбут Одьулуун нэһилиэгин хамаандата (8 мүн. 16 сөк) – 30 куул эбиэһи итиэннэ 3-с миэстэҕэ тиксибит Хоптоҕо нэһилиэгин иккис хамаандата (8 мүн. 36 сөк) – 15 куул эбиэһи тиэнэн бардылар. Манна даҕатан эттэххэ, бастаабыт Хоптоҕо нэһилиэгин хамаандатыгар, Одьулууннааҕы “Комплекс” бааһынай хаһаайыстыбатыттан, Дмитрий Коркин үөрэнээччитэ, көҥүл тустууга успуорт маастарыгар хандьыдаат Иван Парфенов тус бэйэтин аатыттан убаһаны туттарда.
Манна улууска аан бастакытын “Дьөһөгөй оҕотун дьоһун киэргэлэ” иистэнньэҥнэр куонкурустара ыытылынна, манна 1-кы миэстэни Болугур нэһилиэгиттэн Мария Попова кыайыылаах тахсан 20 тыһ.солк суумманан бириэмийэлэннэ, 2-с миэстэ – Хатылы нэһилиэгиттэн Александра Попова ааттанна, киниэхэ 15 тыһ.солк көрүлүннэ уонна 3-с бочуоттаах миэстэҕэ Одьулуун нэһилиэгиттэн Августина Петрова тиксэн 10 тыһ.солк тутта.
Ат сүүрүүтүгэр, 1200 миэтэрэҕэ Болтоҥо нэһилиэгиттэн Кустук диэн алта саастаах сылгы соҕотоҕун сүүрэн оруобуна 2 мүнүүтэнэн кэллэ, сүүрдээччинэн Яков Кривошапкин буолар.
Сылгыһыттан күрэхтэрин хас биирдии түһүмэхтэрин улууспут биллэр ыспарсымыаннара хонтуруоллаатылар, ол курдук оҕунан ытыыга өрөспүүбүлүкэ элбэх төгүллээх чөмпүйүөнэ, РФ успуордун маастара Барыс Баишев, мас тардыһыытыгар өрөспүүбүлүкэ чөмпүйүөнэ, РФ успуордун маастара Ньургун Седалищев, хапсаҕайга, көҥүл тустууга өрөспүүбүлүкэ элбэх төгүллээх чөмпүйүөнэ, призера, успуорт маастара Стив Попов үлэлээтилэр.
Томороон тымныыттан, өҥүрүҥ куйаастан толлубакка, сыралаах, сындылҕаннаах, ыарахан үлэҕэ сылдьар тулуурдаах, хорсун сылгыһыттарбытыгар ситиһиилээх үлэни, чэгиэн туругу баҕарабыт. Сыралаах үлэҕит үтүө түмүктээх эрэ буоллун!
Сэмэн Жендринскэй