Егор Борисов аатынан архыып-бибилэтиэкэҕэ үгэскэ кубулуйбут култуура уонна ускуустуба үлэһиттэрин икки ардыларыгар “Культурологическай ааҕыы” буолла.
Бу ааҕыылары 2017 сыллаахтан улуустааҕы киин бибилэтиэкэ уонна култуура салалтата кыттыһан, Арассыыйаҕа Култуура уонна ускуустуба күнүгэр анаан тэрийэр буолбуттара. Урукку сылларга кыайыылаахтар үлэлэрин түмэн, кинигэни таһаарбыттара.
Быйыл 8 үлэһит бэйэтин тиэмэтин дьүүллүүр сүбэ иннигэр көмүскээтэ. Ол курдук, Чурапчыттан Юрий Толстоухов «Чурапчы гиимин ааптара – Дьуон Дьаҥылы”, Дириҥтэн Марианна Толстоухова “Театр бастакы режиссера”, Чурапчыттан Василена Мохначевская “Главы Ботурусского улуса”, Чурапчыттан Вероника Маркова “Олоҥхону ааҕыы, истии култууратын сайыннарыы”, Чакыртан Светлана Михайлова “Детский киноклуб, как эффективное средство патриотического воспитания”, Чакыртан Сардана Макарова “Чурапчы оһуохайа”, Чакыртан Татьяна Адамова “Олоҥхо – сайдыы кэскилэ”, Кытаанахтан Лена Пономарева “Көһөрүллүү содула Чурапчы историятыгар” тиэмэлэринэн кытыннылар.
Түмүккэ суруйааччылар тустарынан хайысхаҕа 3-с миэстэни Юрий Толстоухов, көҥүл тиэмэлээх хайысхаҕа 1-кы миэстэни Вероника Маркова, 2-с миэстэни Василена Мохначевская, 3-с миэстэни Светлана Михайлова ыллылар.
Елена Макаринская