Чурапчы нэһилиэгин “Утум” дьиэтигэр Ирина Егоровна Саввина салайааччылаах “Илии сылааһа” иистэнэр сыах хамаандата байыаннай дьайыыга сылдьар дьоммутугар «Эр хоһуун» таҥас кэмпилиэгин тигиигэ икки күннээх маастар-кылааһы ыытан саҕалаатылар.
Чурапчы, Мугудай, Хоптоҕо нэһилиэктэриттэн ийэлэр, эбэлэр, тэрилтэртэн бэрэстэбиитэллэрэ барыта холбоон 10 иистэнньэҥ, 5 уопсастыбанньык дьахталлар кыттыыны ылаллар. Салгыы сыах филиалларын тэрийэргэ, ситимнээх үлэни ыытарга былааннаналлар. Чурапчы улууһун дьахталларын уонна “Арассыыйа Ийэлэрин” түмсүүлэрэ сылаас аһынан-үөлүнэн хааччыйдылар.
Улууспут иистэнньэҥнэрэ маастар-кылааһы ыытар Ирина Саввина салайар “Илии сылааһа” иистэнэр сыах хамаандатыгар дириҥ махталларын тиэрдэллэр.
Чурапчы күүһэ — түмсүүгэ!
Сэмэн Жендринскэй