Чурапчыга ыытыллыбыт Тыа хаһаайыстыбатын үлэһиттэрин күнүн биир ураты көстүүтүнэн «Икки сулус» ырыа куонкуруһа буолла. «Айылгы» норуот айымньытын дьиэтин үрдүк сценатыгар тыа хаһаайыстыбатын эйгэтин үлэһиттэрэ уус-уран самодеятельность кыттыылаахтарын кытары дуэттаан кытыннылар. Улууспут нэһилиэктэриттэн 15 араас чаҕылхай нүөмэрдэри дуоһуйа көрдүбүт. «Икки сулуһу» Сылаҥ нэһилиэгиттэн Петр Беляев, Егор Макаровтыын «Ферма кыргыттара» ырыанан арыйдылар. Салгыы Кытаанахтан Алексей Окоемов, Любовь Монгуштуун тыраахтар, кыраабыл, охсуллубут от атрибуттаах киирэннэр, гитаранан доҕуһуоллатан «Биригэдьиир Марыынаны» бэртээхэйдик толороннор, көрөөччүлэргэ ол саҕанааҕы кэмнэри илэ ойуулаатылар. Чурапчыттан Анжелика Сивцева, Аман Винокуров толорууларыгар Айыы Уолун репертуарыттан «Ыллаа, гитарам», Одьулуунтан Терентий Егоров Вера Яковлевалыын «Умай, умай, чүмэчи», Арыылаахтан Николай Демьянов Валентина Поповалыын «Аҕам алааһа», Мырылаттан Лариса Попова уонна Наталья Сергеева «Олох суола», Алаҕартан Иван Хон уонна Елена Тотонова «Музыка», Хайахсыттан Ольга Федотова уонна Владислав Поисеев «Барыма», Мындаҕаайыттан Александра Николаева уонна Каролина Гуляева «Хаар үҥкүүтэ», Хадаартан Людмила Адамова Юрий Бандеровтыын «Алааһым арылы кустуга», Чакыртан Николай Григорьев Сардаана Макаровалыын «Чакыр-дойдум миэнэ», Хоптоҕоттон Галина Родионова Валерий Корякинныын «Ферма кыргыттара», Төлөйтөн Людмила Алексеева Петр Хоютановтыын «Дойдум дьоно», Хатылыттан Людмила Романова, Елена Федосеевалыын «Хатыҥнар», Мугудайтан Иван Чин-Фу Василий Смирниковтуун «Суоллар» ырыалары бииртэн биир кэрэхсэбиллээхтик ыллаатылар.
Тыа хаһаайыстыбатын эйгэтэ, биллэн турар, судургута суох үлэлээх. Өрөбүлэ суох бүппэт түбүктэн быыс булан бэлэмнэнэн, бу куонкуруска кыттыыны ылбыттар кэккэлэригэр Чакыр нэһилиэгиттэн өрөспүүбүлүкэ бүттүүнэ киэн тутта ааттыыр билиҥҥи кэм олоҥхоһуттарыттан биирдэстэрэ, аҕыйах хонуктааҕыта Ил Дархан олохтообут анал стипендиятын хаһаайына буолбут Николай Григорьев баар. Кини саха сиэринэн сүөһү, сылгы иитиитинэн дьарыктанар. Николай Никитич: «Бааһынай хаһаайыстыба буолбуппут ыраатта, 30-ча сыл буолла. Билиҥҥи туругунан 30 кэриҥэ сүөһүнү кыстатан туруорабыт, үүппүтүн манна «Чурапчы» ТХПК-ҕа туттарабыт. Сылгылаахпыт. Хаһаайыстыбабыттан атын дьарыгым диэн—олоҥхо. 2018 сыллаахха Олоҥхо ыһыаҕар Гран-при хаһаайына буоламмын «Нива» массыына ылан турардаахпын. Утумнаахтык дьарыктанар буоламмын тустаах тэрээһиннэри, ыһыахтары көтүппэппин. Онно миэхэ саамай өйөбүлүм кэргэним Дария Константиновна буолар, суох кэмнэрбэр хаһаайыстыба көрүүтэ-истиитэ кини эппиэтинэһигэр хаалар. Барымаары да гыннахпына кини хайаан да тэрийэн, алҕаан ыытар. Бүгүн эмиэ бу ырыа куонкуруһугар кыттаары кэлэн турабын»,—диэн кылгастык билиһиннэрэр.
Маннык баай уопуттаах дьону сэргэ тыа хаһаайыстыбатынан эдэр дьон дьарыктаналлара киһини үөрдэр. Куонкурус кыттыылаахтарыттан биир чаҕылхайдара—Арыылаах олохтооҕо Николай Демьянов сыспай сиэллээҕи иитэр. Кини 2014 сыллаахха саҥа саҕалыыр фермердэргэ көрүллэр граҥҥа хапсан, 1,5 мөл сууманы ылан 70-ча үөрдээх сылгыны атыылаһан үлэтин саҕалаабыт. «Билиҥҥи туругунан 100-тэн тахса сылгылаахпын. 2020 сыллаахха эдэр ыал программаҕа кыттан 3 мөлүйүөннээх Грант үбүн ылары ситиспиппит. Онон «Беларусь» тыраахтары кытта эбии сылгы ылбыппыт. Үлэлиир базабын аҕам Ксенофонт Николаевич оҥорбута. Арыылаахтан 18 км тэйиччи «Үрэх Үҥкүр» диэн сиргэ баар, сылгыларбытын онно көрөн-истэн туруорабыт. Бүгүҥҥү куонкурус туһунан эттэххэ, солун сүүрээн дии санаатым. Дьон-сэргэ көрөрүгэр олус интэриэһинэй, ураты куонкурус диэн сэргээтим. Арыылаах библиотекарын Валентина Попованы кытары саха киһитэ барыта сөбүлүүр «Аҕам алааһа» диэн ырыаны толоруохпут. Улууспут олохтоохторун Тыа хаһаайыстыбатын үлэһиттэрин күнүнэн эҕэрдэлиибин!»,-диэн эдэр киһи санаатын үллэстэр.
Куонкуруска уопсайа 15 дуэттан дьүүллүүр сүбэ финалга Кытаанах, Алаҕар, Сылаҥ, Хоптоҕо, Чакыр, Одьулуун нэһилиэктэриттэн кыттааччылары талан таһаарбыта. Түмүккэ Хоптоҕоттон Галина Родионова, Валерий Корякин 3-с степеннээх, Чакыртан Николай Григорьев, Сардаана Макарова 2-с степеннээх, Кытаанахтан Алексей Окоемов Любовь Монгуштуун 1-кы степеннээх лауреат аатын ылары ситистилэр. Оттон «Икки сулус» ырыа күрэҕин Гран-притын хаһаайыннарынан Сылаҥ нэһилиэгиттэн Петр Беляев, Егор Макаров буоллулар.
Кыайыылаахтары, кыттааччылары бука барыларын эҕэрдэлээн туран сыралаах үлэлэригэр үрдүк ситиһиилэри баҕарабыт!
Наталья Сибирякова