Бу анал оскуолаҕа кыра оҕолоох ийэлэр эбэтэр ийэ буолаары сылдьар кэрэ аҥаардар сылдьаллар. Кинилэри кытта педиатр, акушер-гинеколог, психолог, оҕону эмиийдээн аһатыыга сүбэлиир исписэлиис үлэлэһиэхтэрэ.
Бу сонун бырайыак туһунан ааптар Алгыстаана Федорова сиһилии билиһиннэрдэ:
— Оскуолабыт сүрүн сыалынан доруобай, сайдыылаах оҕо төрүүрүн туһугар ийэҕэ туһааннаах көмөлөрү оҥоруу буолар. Үөрэхпит нэдиэлэҕэ биирдэ буолуоҕа. Бастакы дьарыкпыт босхо Ыччат киинигэр ыытылынна. Көрсүһүүбүтүгэр психологтар анаан-минээн билсиһии тренинын тэрийэн сэргэхситтилэр. Кэлбит кэрэ аҥаардар аһаҕастык кэпсэтэн, билсиһэн астыннылар. Оскуолабыт бырагырааматын билиһиннэрдэххэ, оҕо күүтэ сылдьан бэйэ туругу көрүнүүгэ, төрөөн баран бэйэни харыстаныыга, ийэ үүтүнэн оҕону сөпкө аһатыыга, кыһыл оҕону көрүүгэ-истиигэ интэриэһинэй дьарыктар былааннаналлар. Маны сэргэ кэрэ аҥаардар оҕо ийэ сибээһин бөҕөргөтүүгэ, саҥа киһи дьиэҕэ кэлиитигэр бэлэм буоларга уо.д.а. туһааннаах сүбэлэри ылыахтара. Итини таһынан докумуон эккирэтиһиитигэр, көрүллэр араас көмөнү, босуобуйаны ылыыга консультациялар буолуохтара.
Ити курдук, саҥа аһыллыбыт Ийэ оскуолатыгар кыра оҕолоох ийэлэр эбэтэр ийэ буолаары сылдьар кэрэ аҥаардар элбэх, саҥа, туһалаах билиилэри ылыахтара. Интэриэстээх дьон 89246639352 нүөмэргэ эрийэн билсиэххитин сөп.
Марфа Петрова.