Чурапчы улууһугар бу күннэргэ, гаас баллоннары атыылыыр чааһынай маҕаһыыннарга итиэннэ улахан атыы-эргиэн киин үлэһиттэригэр, хаһаайыттарыгар улуус дьаһалтатын өттүттэн күүстээх өйдөтөр, сэрэтэр үлэ саҕаланна.
Кистэл буолбатах, аҕыйах сылтан бэттэх оскуола үөрэнээччилэрэ биллибэт араас биричиинэлэринэн гаас баллону сыттыыр “ыарыынан” үлүһүйэн эрэллэрэ лаппа күүһүрдэ. Былырыын оҕо өлүүлээх түбэлтэ тахсыбытын бары даҕаны улаханнык соһуйа, дьаархана истибиппит.
Чурапчы улууһун баһылыгын солбуйааччы Алексей Лобанов дьаһалынан итиэннэ улуус дьаһалтатын дьүүллүүр хамыыһыйатын бэрэссэдээтэлэ Виктория Деллохова-Никитина салалталаах, Чурапчытааҕы Ис дьыала уорганын үлэһиттэрэ кыттыылаах бэҕэһээҥҥиттэн саҕалаан номнуо 31 атыы-эргиэн тэрилтэлэрин кэрийдилэр.
- Атыыһыттарга эбэтэр маҕаһыыттан хаһаайыттарыгар 18 сааһын туола илик оҕолорго гаас баллону атыылыыр булгуччулаахтык бобуллар. Саарбахтыыр түгэннэригэр атыылаһааччы пааспарын көрүөхтээхтэр. Инники өттүгэр, хас даҕаны маҕаһыын туох даҕаны харгыһа суох оҕолорго баллоннары атыылаабыт түгэннэрэ көһүннүлэр. Онно оҕолор атыылаһар сылтахтарынан “эбэм эбэтэр ийэм ыллара” ыытта диэн буолар эбит. Биллэн туран тыа сирин усулуобуйатыгар итинник боростуойдук атыылааһын баар. Ол иннитттэн сэрэтэр үлэҕэ иккистээн хатылыы сылдьабыт, — диэн Виктория Семеновна быһаарар.
Санатан эттэххэ, Саха сирин сокуонун бэс ыйын 14-с күнүнээҕи 905 нүөмэрдээх уурааҕыгар итиэннэ улуус дьаһалтатын бэс ыйын 29 күнүнээҕи 1325 нүөмэрдээх дьаһалыгар олоҕуран, сокуоннай сааһын туола илик оҕоҕо (туох сыалга туһанарыттан тутулуга суох) биирдиилээн киһи гаас баллонун атыылыыр түгэнигэр 2000-3000 солкуобайга, дуоһунастаах сирэйдэргэ 10.000-20.000 солк., итиэннэ юридическай сирэйдэргэ 30.000-50.000 солк диэри ыстараап олохтоммута. Онтон иккистээн тутуллар түгэннэригэр, биирдиилээн дьоҥҥо 3000-5000 тыһ.солк, дуоһунастаах сирэйдэргэ 20.000-50.000 солк уонна юридическай сирэйдэргэ 50.000-100.000 солк тиийэ ыстарааптаныахтарын сөп.
Сэмэн Жендринскэй