Улуус дьаһалтатын аактабай саалатыгар Өрөспүүбүлүкэтээҕи психологическай киин үлэһиттэрэ тэрилтэ салайааччыларын уонна бэрэстэбиитэллэрин кытта көрүстүлэр.
Дэлэгээссийэ салайааччыта, киин дириэктэрэ Владимир Скрябин салайар тэрилтэтин үлэтин-хамнаһын, чуолаан анал үөрэҕи ааспыт исписэлиистэр байыаннай дьайыы ыытылла турар сиригэр, госпиталларга тиийэн хайдах үлэлииллэрин билиһиннэрдэ. Маны сэргэ билиҥҥи уларыйа турар уустук кэмҥэ байыастар дьиэ кэргэттэрин уонна уопсай нэһилиэнньэни кытта уйулҕа туругун тупсарарга, ыарахан санааттан-онооттон босхолонорго ыытыллар үлэни сырдатта.
Кини: Анал байыаннай дьайыы психологическай көмөтүн боппуруоһугар үлэлэспиппит номнуо үс сыл буолла. Мобильнай бириигэдэлэр ый аайы госпиталга тиийэн үлэлииллэр. Бу анал байыаннай дьайыы түмүктэнэн, байыастарбыт дойдуларыгар төннөн кэлэллэригэр салалта да өттүттэн көмө, өйөбүл, тирэх буоларга бэлэм буолуохтаахпыт. Онуоха билиҥҥэттэн хас да хайысхалаах ситимнээх үлэлэр ыытыллаллар, — диэн киирии тылыгар эттэ.
Сэминээргэ писихологическай киин дириэктэрин солбуйааччы Октябрина Туприна регион психологическай кыһалҕаларын туһунан дакылааты оҥордо.
Бу күн исписэлиистэр байыаннай дьайыыттан кэлбит уолаттарга уонна кинилэр дьиэ кэргэттэригэр биирдиилээн консультациялары оҥордулар.
Марфа Петрова.