Мунньаҕы СӨ Бырабыыталыстыбатын солбуйааччыта Георгий Степанов, Үлэ уонна социальнай сайдыы миниистирэ Елена Волкова ыыттылар. Ыаллыы сытар Таатта, Амма улуустарыттан, куйаар ситимин нөҥүө Горнай, о.д.а. улуустар кыттыыны ыллылар.
СӨ Үлэ уонна социальнай сайдыы миниистирин солбуйааччыта Елена Теплякова «Элбэх өҥөнү оҥорор дьиэ кэргэн киинэ ыал туруктаах буолуутугар көмөтө», Үөрэх министиэристибэтиттэн Семен Иванов «Төрөппүт оҕону иитиитигэр үөрэх тэрилтэтин оруола», Арассыыйа ийэлэрэ уопсастыбаннай хамсааһын бэрэссэдэтээлэ Прасковья Борисова «Арассыыйа ийэлэрэ «Төрөппүт эппиэтинэстээх буолуутун» сокуона киириитигэр суолтата», о.д.а. дакылааттары иһиттилэр.
Чурапчы улууһуттан С.К. Макаров аатынан гимназия дириэктэрэ төрөппүт эппиэтинэстээх буолуутугар оскуола хайдах үлэлэһэрин, бэйэ уопутугар олоҕуран кэпсээтэ.
Түмүккэ улуус дьаһалтата уонна Үлэ уонна социальнай сайдыы министиэристибэтэ бииргэ үлэлэһии сөбүлэҥин түһэристилэр.
Үөрүүлээх дьаһалга социальнай эйгэҕэ өр кэмҥэ үлэлээбиттэргэ өрөспүүбүлүкэ уонна улуус наҕараадалара туттарылыннылар.
Елена Макаринская