Улууспутугар бу нэдиэлэҕэ Дьиэ кэргэн күнүгэр анаммыт араас хабааннаах дьаһаллар ыытылыннылар. Онтон бүгүн Элбэх өҥөнү оҥорор дьиэ кэргэн киинигэр бу күнү бэлиэтиир үөрүүлээх дьаһал буолла.
Улуус баһылыгын социальнай боппуруостарга солбуйааччыта Мария Кронникова эҕэрдэ тылын эттэ, үйэ аҥаара бииргэ олорбут Людмила уонна Герасим Платоновтарга, Людмила уонна Михаил Степановтарга, Екатерина уонна Николай Макаровтарга “Золотые семьи Якутии” кинигэҕэ киирбиттэрин бэлиэтээн туран, кинилэргэ кинигэни бэлэх уунна.
Людмила Степанова: “Билиҥҥи үйэҕэ ыал буолан, оҕо төрөтөн олорор олус үчүгэй. Урут биһиги оҕолоноот биир ыйынан үлэлии тахсарбыт, билиҥҥи курдук араас материальнай көмөлөр суохтара, быһаччы эттэххэ, ийэ үлэтин чэпчэтэргэ көмөлөөх подгузниктар да суохтара. Онон эдэр ыалларга билиҥҥи олоххо туох баар усулуобуйа барыта баар, этэҥҥэ үлэлээҥ-хамсааҥ, сүрүнэ, дьиэ кэргэн үтүө үгэһин тутуһуҥ, эһэлэргит-эбэлэргит тылларын суолталаан истиҥ, олоххутугар туһаныҥ”, — диэн харда тылы эдэрдэргэ туһаайан эттэ.
“Ыал саргыта” бырайыак чэрчитинэн ыытыллыбыт “Рецепты семейного счастья” куонкурус түмүгүн билиһиннэрдилэр. 3-с миэстэҕэ Байаана Чичигинарова быраатынаан Костялыын, 2-с миэстэҕэ Протодьяконовтар уонна 1-кы миэстэҕэ Софроновтар дьиэ кэргэн тахсан, бириистэри туттулар.
Бу күҥҥэ сөп түбэһиннэрэн, иккис төгүлүн ыытыллар улуустааҕы “Уйа” дьиэ кэргэн күрэҕэ тэрилиннэ. Былырыын бу күрэх Одьулуун нэһилиэгэр ыытыллыбыта, бырайыак ааптарынан Анастасия Афанасьева буолар.
Күрэххэ Кытаанахтан Альбина уонна Иван Оконешниковтар, Мугудайтан Евдокия уонна Александр Колтовскойдар, Хадаартан Марфа уонна Рустам Артемьевтар уонна Чурапчыттан Ольга, Михаил Тарасовтар дьиэ кэргэттэрэ күөн көрүстүлэр.
Кинилэр түөрт түһүмэҕинэн тургутууну аастылар. Ол курдук, бэйэлэрин билиһиннэрдилэр, оҕолор “Уйа” оҥоһугу көмүскээтилэр, аҕалар кус үргээтилэр, ийэлэр күөрчэх ытыйдылар.
Түмүккэ Хадаартан Артемьевтар кыайыылааҕынан таҕыстылар.
Елена Макаринская
Наталья Сибирякова видеота