Бу саҥа киин Саха сиригэр бастакынан, Уһук Илиҥҥэ иккиһинэн үлэҕэ киирдэ. Манна дьиэ кэргэн бары чилиэннэрэ толору, үрдүк хаачыстыбалаах психологическай, социальнай, педагогическай өйөбүллэринэн туһанар кыахтаннылар.
Киин үөрүүлээх аһыллыытыгар СӨ Ил Дархан Айсен Николаев салайааччылаах өрөспүүбүлүкэ салалтатын дэлэгээссийэтэ кытынна.
«Ханнык баҕарар дойдуга дьиэ кэргэн – судаарыстыба тирэҕэ. Ону өйдөөн, биһиги бэрэсидьиэммит Владимир Путин 2024 сылы Арассыыйаҕа Дьиэ кэргэн сылынан биллэрдэ. Оттон өрөспүүбүлүкэбитигэр Оҕо саас сылын биллэрдим. Маныаха сылбыт үлэтэ саҕаланан, Чурапчыга бүгүн бэлиэ күн үүннэ. Ол курдук, Мындаҕаайыга саҥа оскуола уонна бу Дьиэ кэргэҥҥэ элбэх өҥөнү оҥорор киин аһылыннылар. Саҥа киин уратыта диэн – федеральнай киин, өрөспүүбүлүкэ бырабыыталыстыбата, улуус салалтата түмсэн, бэрт кылгас кэм иһигэр Арасссыыйа үрдүнэн саҕаламмыт пилотнай бырайыакка киирэн, тэтимнээхтик үлэлээн, бу эбийиэк саҥардыллан үлэҕэ киирбитинэн үөрэбин», — диэн Айсен Сергеевич тус этиитигэр бэлиэтээтэ.
Ил Дархан Айсен Николаев саҥа тэрилэтэҕэ массыына сэртипикээтин бэлэхтээтэ. Салгыы бэйэтин уонна СӨ Бырабыыталыстыбатын Махтал суругун үтүө суобастаах үлэлэрин иһин Чурапчы улууһун социальнай харалта управлениетын начаалынньыгар Лидия Тосукаеваҕа, үлэ бэтэрээнигэр Александра Мирбобаеваҕа, Чурапчытааҕы социальнай реабилитациялыыр киин дириэктэригэр Мария Саввинаҕа, бу киин исписэлииһигэр Наталья Софроноваҕа, Психологическай киин сэбиэдиссэйин эбээһинэһин толорооччу Виктория Борисоваҕа, социальнай сулууспа бэтэрээнигэр Мария Решетниковаҕа уо.д.а. туттарда.
Кини саҥардыллан оҥоһуллубут эбийиэги көрдө-иһиттэ. Манна аныгы ньыманы, көмпүүтэри туттан, кыра оҕоттон саҕалаан, аҕам саастаах дьоҥҥо туһалаах дьарыктар ыытыллан, олох араас уустуктарыгар түбэспит дьиэ кэргэттэргэ психологическай консультация, доруобуйаларынан хааччахтаах оҕолорго, кинилэр төрөппүттэригэр реабилитация уо.д.а. сөптөөх көмөлөр оҥоһуллан, улуус дьонун-сэргэтин олоҕо тупсарыгар эрэнэрин биллэрдэ.
Бу күн Айсен Сергеевич элбэх оҕолоох ыаллары – өрөспүүбүлүкэтээҕи дьиэ кэргэн куонкуруһун кыайыылаахтарын Екечьямовтары, «Аҕа күрэҕин» призердарын Кривошапкиннары, 60 сыл бииргэ олорбут Дьячковскайдары уонна Арассыыйатааҕы «Любимые-родные» форум лауреаттарын Новгородовтары эҕэрдэлээтэ.
Санатан эттэххэ, маннык Дьиэ кэргэн элбэх өҥөнү оҥорор киин быйыл Нам улууһугар уонна Дьокуускай куоракка аһыллара былааннанар. Бу бырайыак салгыы олоххо киирэн, бигэ туруктаах дьиэ кэргэн элбииригэр олук буоларыгар эрэнэбит.
Марфа Петрова.