Кулун тутар 5 күнүгэр Чурапчыга «Утум» дьиэтигэр Арассыыйаҕа Дьиэ кэргэн, Саха өрөспүүбүлүкэтигэр Оҕо саас сылын чэрчитинэн СӨ «Сахабэчээт» тэрилтэтин өйөбүлүнэн, «Чолбон» сурунаал тэрийиилэринэн «Чолбон өй күрэһэ» улахан оонньуу ыытылынна. Манна Одьулуунтан, Сылаҥтан, Хатылыттан, Чурапчыттан биэс дьиэ кэргэн кыттыыны ыллылар. Оонньуу саҕаланыытыгар «Чолбон» сурунаал бас эрэдээктэрэ Гаврил Андросов эҕэрдэ тылы эттэ. Өй күрэҕин түөрт түһүмэҕинэн эрэдээксийэ үлэһитэ Туйаара Павлова иилээн-саҕалаан ыытта. Саха литэрэтиирэтин төрүттээбит суруйааччылартан саҕалаан аныгы кэм айымньыларыгар тиийэ олус интэриэһинэй ыйытыыларга кыттааччылар бэрт түргэнник хоруйдаатылар.
Түмүккэ оонньуу кылаан кыайыылааҕынан Одьулуун нэһилиэгиттэн Иван Ильич Попов дьиэ кэргэнэ буолла, бириистээх миэстэҕэ тахсыбыттар, бары кыттааччылар бириистэринэн, бэлиэ суруктарынан наҕараадаланнылар.
Дьүүллүүр сүбэҕэ Гаврил Андросов уонна суруйааччы Павел Фёдоров-Сомоҕо үлэлээтилэр.
Бу оонньуу кулун тутар 22 күнүгэр диэри өрөспүүбүлүкэ улуустарынан салҕанан барар, онтон Саха сирин үрдүнэн кыайыылаахтары быһаарар түмүктүүр күрэх муус устарга Дьокуускайга ыытыллыаҕа.
Наталья Сибирякова