Егор Афанасьевич кэргэнинээн Прасковья Петровналыын уонна чугас дьонун кытта Чурапчыга кэллэ.
Сарсыарда сотору үлэҕэ киириэхтээх бибилэтиэкэ-архыып дьиэтин көрдө.
Ол кэнниттэн «Егор Борисов» диэн «Жизнь замечательных людей» сериянан тахсыбыт кинигэ сүрэхтэниитигэр сырытта. «Жизнь замечательных людей» серияҕа дойду култуурунай, экономическай, социальнай сайдыытыгар улахан өҥөлөөх, бэйэлэрин суолларын-иистэрин хаалларбыт үтүөкэн дьон олоҕо, үлэтэ суруллар.
Үөрүүлээх түгэнинэн Егор Афанасьевиһы эҕэрдэлии РФ сенатора Сахамин Афанасьев, СӨ Ил Түмэн бэрэссэдээтэлэ Алексей Еремеев, Ил Түмэн бэрэссэдээтэлин бастакы солбуйааччыта Александр Жирков, СӨ Бырабыыталыстыбатын бэрэссэдээтэлин солбуйааччы Георгий Степанов, онтон да атын урут да, билигин да бииргэ үлэлээбит-үлэлэһэр дьоно кэллилэр.
Чурапчы улууһун баһылыга Степан Саргыдаев киэн туттарын бэлиэтээн туран, улууһун дьонун-сэргэтин аатыттан бэлэҕин туттарда.
Тэрээһин түмүгэр Егор Борисов кинигэлэригэр илии баттаан туран, дьоҥҥо-сэргэҕэ бэлэхтээтэ.
Елена Макаринская