ССРС бэчээтин туйгуна, Саха Өрөспүүбүлүкэтин норуот хаһаайыстыбатын үтүөлээх үлэһитэ, Чурапчы улууһун Бочуоттаах гражданина – салайааччыбыт, настаабынньыкпыт Петр Михайлович Массаев быйыл тохсунньу 15 күнүгэр 90 сааһын туолла.
Кини олоҕун, үлэтин туһунан «Саҥа олох» хаһыаппытыгар толору сырдатылынна. Улууспутугар бэчээт сайдыытыгар оруола ойуччу тутуллан бэлиэтэннэ.
Типография оройуоҥҥа биир бастакынан үлэтин саҕалаабыт бырамыысыланнай тэрилтэ буолар. Петр Михайлович 1954 сыллаахха комсомол райкомун путевкатынан бу тэрилтэҕэ наборщик үөрэнээччитинэн үлэлии кэлиэҕиттэн, 42 сыл устата харыс да сири халбарыйбакка, дириэктэргэ тиийэ үүнэн үлэлээбитэ. Очолорго типографияҕа сүнньүнэн Новосибирскайдааҕы полиграфистары бэлэмниир училищены бүтэрбит каадырдар үлэлээбиттэрэ. Итиннэ типография салалтатын оруола улахана. Үксүбүт кинилэр биэрбит направлениеларынан үөрэҕи бүтэрэн кэлэн үлэлииргэ дуогабардаах үөрэммиппит. Училище наборщик, бэчээттээччи, массыынаҕа талыы (линотипист) идэлэригэр үөрэтэрэ. Мария Дьячковская, Мария Михайлова—Саввина, Алексей Слепцов 1975 сыллаахха үлэлии кэлэрбитигэр биһиги иннибитинэ бүтэрбит Светлана Монастырева, Татьяна Смирникова, Мотрена Гуляева үлэлии сылдьаллара. Биһиги кэннибититтэн Светлана Семенова, Петр Саввин, Анастасия Сивцева, Анна Дьячковская, Валя Эверстова, Борис Васильев, Галина Гуляева, о. д. а. тэрилтэ тутаах үлэһиттэрэ буолбуттара. Билигин «Саҥа олох» редакционнай-издательскай холбоһукка Аксинья Лыткина, Федор Протодьяконов таһаарыылаахтык үлэлии сылдьаллар.
Көмпүүтэр кэмэ кэлэ илигинэ, типографияҕа хаһыат нэдиэлэҕэ үстэ бэчээттэнэрэ, 4000 экземплярга тиийэ сылдьыбыта. Ону таһынан араас былааҥкалар, паапкалар, билиэттэр, о. д.а. оҥоһуллаллара. Үлэ, омуна суох эттэххэ, сороҕор түүннэри барара, симиэнэнэн арахсарбыт. Кэлэктиип олус түмсүүлээҕэ, ыччат-комсомольскай аатын сүгэрэ. Социалистическай куоталаһыы инники күөнүгэр сылдьарбыт, знамянан, вымпелынан, грамоталарынан наҕараадаланарбыт, араас пуондалары ылаттаабыппыт.
Үлэни тэрийии, салайыы, биллэн турар, салайааччыттан улахан тутулуктаах. Биэнсийэҕэ тахсыар диэри 20 сыл типографияны салайбыт Петр Михайлович Массаев барыбытын түмэн үлэлэппитин билинэбит. Эдэр дьону үлэҕэ такайан, үөрэтэн, олохпут суолун буларбытыгар олук уурсубутугар барҕа махталбытын этэбит. Кэлин, бочуоттаах сынньалаҥҥа тахсыбытын да кэннэ, сибээспитин быспаппыт, мэлдьи билсэбит. Ытык кырдьаҕаспыт ыллыктаах тылын-өһүн, сүбэтин ылынабыт.
Үбүлүөйгүнэн, ытыктабыллаах Петр Михайлович! Чэгиэнник, этэҥҥэ сылдьан, 100 сааскын томточчу туоларгар баҕарабыт!
Алексей Слепцов.