Бэҕэһээ о.э. кулун тутар 21 күнүгэр Александр Федотов аатынан успуорт уораҕайыгар, уһуйаан оҕолорун икки ардыларыгар “Тугутчаан” хотугу ыспартыыбынай оонньуулар аан бастакытын ыытылынна.
Бу күрэх М.Т. Спиридонова аатынан Чурапчытааҕы “Чуораанчык” уһуйаан көҕүлээһининэн, улуустааҕы үөрэх салалтатын уонна Чурапчытааҕы судаарыстыбаннай физкултуура уонна успуорт үнүстүүтүн өйөбүллэринэн ыытылынна.
Оонньууларга барыта холбоон улууспут 11 уһуйаанытан 44 оҕо үс көрүҥҥэ күрэхтэһэн илин-кэлин түһүстүлэр. Көрүҥ ахсын кыайыылаахтарга мэҥэ суруктар туттарылыннылар.
Үс көрүҥ түмүгүнэн биирдиилээн бастыыр иһин күрэххэ кыргыттарга бастакы миэстэни Чурапчы нэһилиэгин “Мичил” уһуйаан иитиллээччитэ Карина Сивцева буолла, 2 миэстэ – Хатылы нэһилиэгин “Ньургуһун” уһуйааныттан Тамила Соловьева, 3 миэстэ эмиэ Хатылы уһуйаанын иитиллээччитэ Динара Кривошапкина буоллулар.
Уолаттарга бастыҥнарынан, 1 миэстэ – Тимур Попов, Чурапчы нэһилиэгин “Чуораанчык” уһуйаанын иитиллээччитэ, 2-с бириистээх миэстэҕэ Хатылы уһуйааныттан Уйусхан Местников тигистэ уонна
3 миэстэ — Мындаҕаайытааҕы “Ымыы” уһуйааныттан Ганя Гермогенов таҕыстылар. Кырачаан ыспарсымыаннарга мэтээл, диплом туттарылынна.
Хамаанданан уопсай түмүккэ, Хатылытааҕы “Ньургуһун” уһуйаан муҥутуур кыайыылаах аатын ылла, 2 миэстэҕэ Чурапчы нэһилиэгин “Чуораанчык” уһуйаана, 3 миэстэҕэ Мындаҕаайытааҕы “Ымыы” уһуйаан ааттаннылар. Кыайыылаахтарга диплом, мэтээл, кубок уонна сэртэпикээт туттарылынна.
Сэмэн Жендринскэй