Чурапчы улууһуттан 100 оҕо уонна устудьуон «Азия оҕолоро» спортивнай оонньууларга, хас да түһүмэхтээх сүүмэрдээһини ааһан, волонтер быһыытынан үлэлииллэр. Волонтер сыралаах, түбүктээх үлэтин туһунан улуус оҕолорун «Чурапчы кэскилэ» хамсааһынын салайааччы Богдан Логинов кэпсээтэ:
— Улахан аҥаарбыт – оскуола үөрэнээччилэрэ буолабыт. Саамай элбэх оҕо «атташе” хайысхатыгар баарбыт. Ол эбэтэр, атташе-волонтердар сыһыарыллыбыт дэлэгээссийэлэрин аэропорка көрсөн, оонньуулар кэмнэригэр арыаллыы сылдьаллар, ыспарсымыаннары күн аайы дьарыктарыгар илдьэллэр, куорат устун күүлэйдэтэллэр. Мин Арассыыйа бэдэрээссийэтин дэлэгээссийэтин уонна Урал уокуругун спортивнай үҥкүүгэ кыттааччыларын атташета буолуохтаахпын. Кэлиэхтэригэр диэри, билигин хас да хамаанданы – саахымаччыттары, дзюдо уонна самбо көрүҥнэригэр кыттааччылары арыаллыыбын. Маны таһынан элбэх оҕо спорт эбийиэгин волонтердарынан үлэлииллэр.
Волонтердар бары интэриниэт нөҥүө анал үөрэҕи ааспыппыт. Онтон бэс ыйын 17 күнүттэн функциональнай үөрэх саҕаламмыта. Манна биһиги, Чурапчы үөрэнээччилэрэ, биир нэдиэлэ устата үөрэммиппит. Хас биирдии волонтер ыксаллаах быһыыга-майгыга бэлэм буолуохтаах. Онуоха баһаар, терракт тахсар түгэнигэр туох дьайыыны оҥоруохтаахпытын уонна бастакы көмөнү оҥорууга үөрэммиппит. Маны тэҥэ атын норуоттары кытта кэпсэтэргэ сүбэ-ама ылбыппыт.
Манна кыттан, атын норуоттар култуураларын биллим, биир санаалаах оҕолору кытта билистим, элбэх саҥа доҕоттордоннум. Уопсайынан, араас үчүгэйгэ үөрэнним, элбэх саҥаны биллим.
Бэлиэтээн эттэххэ, бу улахан спортивнай оонньууларга 1900 волонтер 19 хайысханан үлэлиир. Барыта 5000 сайаапка Арассыыйа 60 регионуттан уонна түөрт тас дойдуттан киирбит.
Марфа Петрова.