Бүгүҥҥүттэн, о.э олунньу 6-9 күннэригэр, Чурапчы нэһилиэгэр, Александр Федотов аатынан успуорт уораҕайыгар саастарын ситэ туол илик уолаттарга аармыйаҕа ыҥырыллыахтарын иннинэ доруобуйаларын туругун бэрэбиэркэлиир байыаннай хамыыһыйа тэриллэн үлэтин саҕалаата.
Манна улууспут 17 нэһилиэгиттэн, 2008-09 сыллааҕы төрүөх уолаттар оскуолаларыттан учуутал арыалдьыттаах, сорох-сорохтор ийэлэрин батыһыннаран биир-биир исписэлиистэри кэрийэ сылдьалларын көрүстүбүт.
Оскуола үөрэнээччилэрэ уочаратынан харах, тиис, психиатр, неврапатолог, хирург, терапевт быраастарыгар көрдөрүнэн, доруобуйаларын туругун бэрэбиэркэлэниэхтэрэ.
“Биһиги оскуолабытыттан элбэх оҕо кэллэ, биир уолбут бэҕэһээ анаалиһын кыайан туттарбакка хойутаата. Быраастары барыларын кэрийэн бу терапевка киирэн таҕыстым. Доруобуйам туругун “олох үчүгэй” диэтилэр. Аармыйаҕа сулууспалыыр баҕалаахпын, кыаллар буоллаҕына ВДВ эбэтэр ЖД чааһыгар сулууспалыам этэ. Медицинскэй хамыыһыйаны бэйэҥ түргэн буоллаххына кылгас бириэмэ иһигэр таах ааһар эбиккин, дьиҥэр алта хас чаас хамыыһыйаны ааһыаххыт диэбиттэрэ ол эрэн оннук буолбатах эбит. Көрдөрүнэн бүтэн хааламмын аны оскуолаҕа үөрэнэ барыахпын наада буоллла”, — диэн буойун-учуутал Иван Павлов аатынан Чурапчы орто оскуолатын 10 кылааһын үөрэнээччитэ Коля Горохов күлэ-үөрэ санаатын үллэһиннэ.
Сэмэн Жендринскэй. Ааптар хаартыскаҕа түһэриитэ