Алтынньы 13-16 күннэригэр Владивосток куоракка бастакытын ыытыллар Уһук Илиҥҥи уокуруктааҕы «На волне» ыччат форума үрдүк таһымнаахтык буолла. Бу форум «Росмолодежь» платформа көмөтүнэн тэриллэр.
Дьаһалга Арассыыйа араас куораттарыттан араас эйгэҕэ үлэлиир, үөрэнэр 1200 кэриҥэ ыччат кэлэн, үөрэнэн, сайдан, саҥа доҕоттордонон, түөрт күнү бэрт таһаарыылаахтык атаардылар. Манна Саха сириттэн түөрт ыччат ситиһиилээхтик кытынна. Олортон биирдэстэринэн Чурапчытааҕы киин бибилэтиэкэ эдэр үлэһитэ Вероника Маркова буолар. Кини форум туһунан билиһиннэрэр:
— Саха сириттэн түөрт кыыс буолан сырыттыбыт. Соһуйуох курдук бары айымньылаах култуура үлэһиттэрэ эбиппит. Ол курдук, Амма улууһуттан Сулҕаччы кулуубун уус-уран салайааччыта Александра Матвеева, Амматааҕы култуура салалтатын исписэлииһэ Зоя Пахомова уонна Мэҥэ Хаҥалас улууһун култуура салалтатын методиһа Галина Старостина кытыннылар.
Форум иһинэн үс хайысхаҕа арахсан үөрэннибит. Кылгастык билиһиннэрдэххэ, “На волне успеха” хайысхаҕа урбаанньыттар уонна бэйэ дьыалатын арыныан баҕарар ыччаттар уопуттаах спикердартан бырайыагы оҥоруу, саҥа бизнеһи саҕалааһын туһунан туһалаах сүбэлэри ыллылар. «На волне играя» хайысхаҕа информационнай технологияҕа үлэлиир эдэр дьон саҥа оонньуулары айдылар. Ол курдук, нейроннай ситими (нууч. нейросеть) туһанарга, оонньуу концепциятын толкуйдуурга үөрэннилэр. «На волне творчества» хайысхаҕа киһи бэйэтин ураты айар хаачыстыбатын дьоҥҥо-сэргэҕэ тиийимтиэтик тиэрдэр туһунан сиһилии кэпсээтилэр.
Тус бэйэм бырайыак туһунан өйдөбүлү үөрэтээри «На волне успеха» хайысханы талбытым. Кыттааччыылар бары ураты, сонун идиэйэлээхтэр, эрчимнээхтэр, дьаныардаахтар. Сорох ыччаттар бэйэлэрин сыалларын олоххо киллэрэн, бэйэ дьыалатын арыммыттар этэ. Хамаанданан арахсыыга, билбэт оҕолорбун кытта түбэспитим. Бырайыак оҥоруутугар, тиэмэбитин таларбытыгар хас биирдии киһи тус санаатын үллэстэн, ырытыһан, олус интэриэһинэй уопут буолла. Бырайыак суруйарга былаан, смета, дизайн, реклама оҥорорго спикердар үөрэппиттэрин тутатына туһанан, көмүскээһиҥҥэ үс эксперт өйөбүлүн ылан, кыайыылааҕынан таҕыстыбыт.
Маннык тэрээһиннэр ыччат сайдарыгар улахан кыахтары биэрэр. СӨ Ыччат дьыалатыгар министиэристибэтин бырагырааматын чэрчитинэн улуус дьаһалтатын ыччаты кытта үлэлиир отдел кэлэр-барар айаны төлүүр. Онтон бу форум тэрийээччилэрэ олорор сирбитин, аһылыкпытын, куорат иһинэн айаммытын барытын уйунна. Онон буор-босхо сылдьан кэллим.
«Росмолодежь» тэрийэр бары тэрээһиннэригэр судургутук ыҥырыа тутуохха сөп. Ол курдук, https://events.myrosmol.ru сайтка Арассыыйа араас куораттарыгар ыытыллар тэрээһиннэр испииһэктэрин киирэн көрөҕүн. Талбыт тэрээһиҥҥитигэр ыйыллыбыт болдьоҕор регистрация ааһаҕыт. Маныаха бииргэ эрэ буолбакка хас да тэрээһиҥҥэ тэҥҥэ сайаапка ыытар ордук. Онтон, иккис түһүмэххэ, билиини тургутар дьоҕус тест ааһаҕын эбэтэр чэпчэки сорудах толороҕун. Бу саас Сочига аан дойдутааҕы ыччат бэстибээлэ буолаары турар. Онон түгэни мүччү туппакка көхтөөхтүк сайаапката ыытыҥ. Тус бэйэм форумҥа кыттан, ИТ-технология олус күүскэ сайдаары турарын көрдүм. Онуоха активнай позициялаах, эрчимнээх, саҥа көрүүлэрдээх ыччаттар инники күөҥҥэ тахсыахтара диэн эрэнэбин.
Марфа Петрова.