Чурапчы улууһун 23 олохтооҕо тулалыыр эйгэни дьэҥкэтин, ыраастык, доруобай харахтарынан көрөр буоллулар. Бу туһунан Дьокуускайдааҕы харах балыыһата суруйар.
От ыйын 21 күнүгэр автобус эмтэнээччилэри Дьокуускайга балыыһаҕа илдьэн биэрбит. Сарсыҥҥы күнүгэр катаракталаах харахтарын эпэрээссийэлээбиттэр, 16 киһи икки хараҕын оҥотторбут.
Чурапчыга эмтэнэ барааччылары офтальмолог Наталья Соколова быһаарбыт, оттон куоракка эпэрээссийэни оҥорбут хирурдарынан Максим Дьячковскай уонна Иннокентий Белолюбскай буолаллар. Эмтэнээччилэр 65-75 саастаах дьон. Онон кинилэргэ айаннаан тиийэр ороскуоту, түһэр сири, балыыһаҕа илдьэр-аҕалар киһини булуу кыһалҕатын көрсүбэтэхтэрэ улахан үөрүү.
Бүгүҥҥү күҥҥэ эмтэнээччилэр бары дьиэлэригэр тахсан сылдьаллар. Харах эпэрээссийэтин икки күн устата оҥорон бүтэрдилэр.
Елена Макаринская
Видеолар, хаартыскалар Дьокуускайдааҕы харах балыыһатын телеграм-каналыттан ылылыннылар.