Бэҕэһээ о.э от ыйын 25 күнүгэр, Чурапчы улууһунааҕы полиция отделыгар: “Биллибэт дьоҥҥо 3 мөлүйүөнтэн ордук суумманы албыннаттым”, — диэн 53 саастаах оскуолаҕа үлэлиир дьахтартан сайабылыанньа киирдэ.
Бу иннинэ, өссө бэс ыйын ортото, дьиэтигэр олорон эрэ “Ютуб” ханаалын сыһыарыытыгар “Газпромбаан” инвестиция рекламатын көрбүт, итиэннэ ол сигэҕэ киирэн ыйыллыбыт тургутугу толорон, бэйэтин тус дааннайдарын уонна суотабай төлөпүөнүн нүөмэрин суруйбут. Сотору буолаат, биллибэт нүөмэртэн: “ “Газпромбаан” финансиһа Дария Ефремова диэммин”, — диэн нуучча дьахтарын чоҥ куолаһа иһиллибит, итиэннэ үс күнүнэн акция сыаната үрдээри турарынан, биирдии акцияны баара-суоҕа 170-нуу солк атыылаһарыгар этии киллэрбит. Онуоха тыа сирин боростуой олохтооҕо дьахтар хап-сабар итэҕэйэ охсоот, “Газпромбаан” аахсыйатын атыылаһабын диэн Елезовета Романовна К., диэн ааттаах киһи счетугар 10 тыһ.суумманы көһөрбүт. Ити кэнниттэн Дария Ефремова хат звоннаан: “Техническэй отделтан эрийиэхтэрэ, скайп сыһыарыы нөҥүө үлэлииргэ, личнэй кабинет уонна брокерскай счет арынарга үөрэтиэхтэрэ”, — диэн сэрэппит.
Өр өтөр буолбатах, “Скайп” сыһыарыы нөҥүө, аналитическай отдел үлэһитэбин диэн Борис Леонидович Грановский сибээскэ тахсыбыт, ол эрэн иллэҥим суох диэн сылтаҕыран, Владимир Александрович Наумов диэн сотруднигы кытары сибээскэ холбообут. Кэпсэтии кэмигэр, Владимир Александрович, брокерскай счету хайаан даҕаны толоруохха наада диэн 89163271495 нүөмэргэ сбербанк онлайн-наах Машенко Олег Денисович диэн киһи нүөмэрин эппит, эрэл санаалаах учуутал дьахтар 2 мөл 609 тыһ 526 солк суумманы тутатына көһөрбүт. Ити кэнниттэн эбии 395 тыһ.солк суумманы 891662383092 Мкртчян Мкртич Меружанович диэн киһи аатыгар ыыппыт. Салгыы 130 тыһ суумманы 89231872778 Мухаммат Х., диэн киһи аатыгар перевод оҥорбут. Инньэ гынан уопсай суумма 3 мөл. 42 тыһ 526 солк тахсыбыт. Отдел үлэһиттэрэ киирбит сайабылыанньанан РФ ХК 159 ыстайтыатын 3 чааһынан холуобнай дьыаланы көбүттүлэр, сэлиэстийэ ыытыллар.
Чурапчытааҕы Ис дьыала отдела өссө төгүл улууспут олохтоохторун сэрэтэр: “Арай эйиэхэ баантан, полицияттан, билбэт нүөмэргиттэн ким да эрийдин, эн, бастатан туран, уоскуйуохтааххын. Өйгүн-төйгүн булунан баран, аймаҕыҥ, оҕоҥ туһунан этэр буоллахтарына, бэйэҥ дьоҥҥор сибээскэ тахсыахтааххын.
Иккиһинэн, атыы-эргиэн саайтарыгар табааргын ыыта иликтэринэ, харчы ыытартан туттунарыҥ ордук. Түөкүттэр арахпакка эрийэр буоллахтарына, суһаллык 102 эбэтэр 112 нүөмэрдэргэ эрийэргин умнума! Ханнык да түгэҥҥэ каартаҥ нүөмэрин, пааспарыҥ дааннайдарын этимэ”.
Сэмэн Жендринскэй