Убаастабыллаах коллегалар!
Бүгүн, алтынньы 30 күнүгэр, дойду үрдүнэн тириэньэр диэн үтүөкэннээх идэни чиэстиибит. 1999 сылтан саҕалаан, оҕону-ыччаты успуорка эбии үөрэхтээһин оскуолалар тириэньэрдэрэ, анал хамаандалар, кулууптар настаабынньыктара, фитнес-тириэньэрдэр, нэһилиэк ыспартыыбынай инструктордара уонна биллэн туран физическэй култуура, успуорт эйгэтин үлэһиттэрэ идэлээх бырааһынньыктарын бэлиэтииллэр.
Быйылгы дьыл Уһуйааччы уонна настаабынньык сылынан биллэриллибитэ. Быйыл биһиги Улуу тириэньэр Дмитрий Коркин, ыспартыыбынай хамсааһын улахан салайааччыта Афанасий Софронов 95 сылларын бэлиэтээтибит. Бу барыта тириэньэр уонна учуутал идэлэрин социальнай оруолларыгар үрдүктүк сыаналаммыта саарбаҕа суох. Бүгүҥҥү күҥҥэ биһиги улууспутугар сүүһүнэн тириэньэр үлэлии-хамсыы сылдьаллар. Кинилэртэн аҥардара интэринээт-оскуолаҕа, о.д.а үөрэх кыһаларыгар үөрэнээччилэри кытары үлэлииллэр.
Тириэньэр диэн бу дьиҥнээх физкултуурунай хамсааһыны тэрийээччи буолар, эдэр үүнэн иһэр көлүөнэни успуорду кытары алтыһыннаран суолталаах кыайыыларга, үрдүкү көрдөрүүлэргэ дьулуһуннарар тутаах киһибит буолар.
Инньэ диэн туран, Чурапчыбыт улууһун бары тириэньэрдэригэр талааннаах, кыахтаах, дьулуурдаах иитээччилэри баҕарабыт, бу маннык уустук идэҕэ бэйэҕит олоххутун анаабыккытыгар дириҥник махтанабыт. Күн аайы хара көлөһүҥҥүтүн тоҕон туран үлэлииргит, тулуургут, сыалы-соругу ситиһиигит бу барыта Чурапчы инникилэригэр төһүү күүс буолаллар, эһиги баар буолаҥҥыт Чурапчы – успуорт туонатынан ааттанар. Эһиилги 2024 сылы дойду бэрэсидьиэнэ Владимир Путин — Успуорт сылынан биллэрдэ, онон иннибитигэр өссө күүстээх үлэлэр күүтэллэр.
Иитээччилэргит ситиһиилэринэн, кыайыыларынан-хотууларынан барыбытын үөрдэ турдуннар. Бука барыгытыгар кытаанах доруобуйаны, тириэньэрискэй маастарыстыбаны, тулууру уонна үгүс үөрүүнү баҕарабыт. Өссө төгүл идээлээх бырааһынньыккытынан!
Эҕэрдэни кытары Дьулустан Егоров.