Тохсунньу 26 күнүгэр Чурапчы улууһун дьаһалтатын 2023 сыллааҕы үлэтин-хамнаһын отчуота Хоптоҕо нэһилиэгэр буолла. Быйылгы отчуот урукку сыллартан сүрүн уратыта диэн улууспут баһылыга Степан Саргыдаев хас биирдии нэһилиэккэ дэлэгээссийэ салайааччытынан тус бэйэтэ сылдьан олохтоохтору кытары сирэй көрсөн, онно тутатына туруоруллубут боппуруостарга хоруйдаата.
Хоптоҕоҕо мунньаҕы нэһилиэк баһылыга Алексей Бурцев салайан ыытта. Бастатан туран, «Чурапчы улууһа (оройуона)» МТ баһылыга Степан Саргыдаев олохпут-дьаһахпыт бары хайысхатын хабан туран уопсай иһитиннэрии оҥордо.
Сүрүн дакылаат кэнниттэн, өрүү буоларын курдук, ыйытыыларга, этиилэргэ киирдилэр.
Егор Корякин Уорҕаны кытары ситимниир муоста өрөмүөнүн туһунан туоһуласта. Биир кэлим сакаасчыт сулууспатын салайааччыта Б.П.Архипов муостата быһаарылыннаҕына, үп-харчы өттүнэн сөҥнөһүү кэннэ өрөмүөн ыытыллыан сөбүн эттэ.
Саргылана Ефимова анал байыаннай дьайыы кыттыылаахтарын төрөппүттэригэр киин ититии холбоммутугар махтанан туран, быһыттар, дьүөдьэлэр балаһыанньалара нэһилиэккэ кутталы үөскэтэрин бэлиэтээтэ. Манна улуус баһылыга С.А.Саргыдаев нэһилиэк баһылыгар А.Л.Бурцевка, тустаах исписэлиистэргэ баланска киллэрэн, мелиорация хонтуруолугар ылалларыгар сорудахтаата.
Маны таһынан олохтоох нэһилиэнньэттэн суол-иис өрөмүөнүгэр, анал байыаннай дьайыы кыттыылаахтарын дьиэ кэргэттэригэр көрүллэр араас көмөҕө, социальнай хантыраакка, почта, ветеринария, балыыһа үлэтигэр, доруобуйаларынан хааччахтаахтарга дьиэ уочаратыгар, тыа хаһаайыстыбатыгар сыһыаннаах ыйытыылар киирэн сөптөөх хоруйу ыллылар.
Этиилэргэ Семен Сергеев 2023 сыллааҕы үлэ үчүгэйдик барбытын бэлиэтээтэ, үөрэҕирии, спорт, култуура өттүгэр үрдүк ситиһиилэрин ыйан туран ол аата улууспутугар сайдыы барарын тоһоҕолоото, эдэрдэри сүөһү көрүүтүгэр сыһыарыы үлэтэ барыан, икки совхоз тэриллибитэ 50 сыллаах үбүлүөйүн тэрийиэххэ, Чакырга оскуоланы киллэриэххэ, Олоҥхо дьиэтин астарыахха, Дьиэ кэргэн сылын үчүгэйдик тэрийиэххэ, совхоз скверин олбуорун оҥоруохха наада диэн санаатын үллэһиннэ. Ону таһынан үүт тутуутугар, гаастааһыҥҥа тохтоото, нэһилиэккэ баанньык итииэннэ эбии биир баһаарынай массыына наада диэтэ.
Олохтоохтор мунньах түмүгүнэн дьаһалта 2023 сыллааҕы үлэтин 100 бырыһыан сөптөөҕүнэн сыаналаатылар.
Наталья Сибирякова