Үөрэх үлэһиттэрин балаҕан ыйынааҕы сүбэ мунньахтарын пленарнай чааһа “Айылгы” НАДь ыытылынна. Сүрүн дакылааты үөрэх салалтатын начаалынньыга Юрий Посельскай оҥордо. Кини ааспыт сыл ситиһиилэрин, саҥа үөрэх дьылыгар үөрэхтээһин систиэмэтигэр киирбит саҥа уларыйыылары, былааннары, оҕону иитиигэ уонна үөрэтиигэ тирээн турар боппуруостары билиһиннэрдэ.
Мунньахха улуус баһылыга Степан Саргыдаев кытынна. Кини: “Эһиги, учууталлар, үөрэх өттүгэр дириҥ билиини биэрэр уопуттаах, таһымнаах учууталларынан буоларгытын билэбин. Үөрэҕи таһынан оҕоҕо иитии өттүгэр сүрүн болҕомтону ууруохтааххыт. Оҕолорбут үчүгэй дьон буолан тахсалларыгар, өй-санаа өттүнэн туруктаах буолалларыгар төһүү күүс буолуохтааххыт”, — диэн сүрүн сорук быһыытынан эттэ.
Дьаһал үөрүүлээх чааһыгар үөрэх-иитии кыһатын үлэһиттэрэ чиэстэннилэр. Тоҕус оскуола дириэктэрэ Акулина Кузьмина хоһоонунан композициятын аахпыттара, улуус оскуолаларын иитэр үлэҕэ солбуйааччылара Евгения Чичигинарова тылларыгар “Уһуйааччыга” ырыаны сүрэхтээбиттэрэ, физкултуура учууталлара “Чурапчы-спорт туоната” ырыаны ыллаабыттара киэҥ биһирэбили ылла.
Елена Макаринская