Улуус баһылыга Степан Саргыдаев отчуотун бары нэһилиэктэргэ бэйэтэ сылдьан ыытыаҕа. Кинини кытта солбуйааччылара, туһааннаах тэрилтэ салайааччылара кыттыыны ылаллар. Бүгүн Бахсы уонна Алаҕар нэһилиэктэригэр сырыттылар.
БАХСЫГА
Бахсы олохтоохторо сүрүннээн ититиинэн хааччыллыы, Чыаппара-Бахсы суолун оҥоһуутун боппуруостарын туруордулар. Хочуолунай кыамтатын үрдэтэн, үөһэ эҥэр олорор түөрт ыал хаалбытын холбуулларыгар эттилэр. Ону таһынан доруобуйа харыстабылыгар, үөрэхтээһиҥҥэ, култуураҕа кэккэ ыйытыыларга хоруйдары ыллылар.
Учуутал Мария Барашкова үөрэнээччитэ, Инникигэ хардыы НПК лауреата Регина Тарабукина Москваҕа кытта барарыгар көмөнү көрдөстө. Татьяна Попова оҕото байыаннай дьайыыга тиийэн, сураҕа суох сүппүтүн, киниэхэ маннык түгэҥҥэ ыйар-кэрдэр туһааннаах киһини аныылларыгар эттэ. Харитина Шеломова уус-уран самодеятельноһы көрүү күрэҕэр быйыл олоҥхо хайысхатын киллэрбиттэрэ кыра нэһилиэккэ уустуктары үөскэппитин, инникитин судургутутан биэрии суолларын этии быһыытынан киллэрдэ.
АЛАҔАРГА
Алаҕардарга эмиэ ититиинэн хааччыллыы боппуруоһа сытыытык турар. Хочуолунайы саҥардары, чох хаачыстыбатын тупсарары туруорустулар. Тыа хаһаайыстыбатыгар үүт сыанатын үрдэтиигэ, сүөһү боруодатын тупсарыыга, сайылыгы уотунан хааччыйыыга этиилэрин киллэрдилэр.
Иван Хон Лампаарыкыттан 100 м тэйиччи сытар сайылыкка уота суоҕун, сыл аайы туруорсарын, РЭС урукку сопхуос көрүүтүгэр баар диэн көрбөтүн-истибэтин эттэ.
Оскуола директора оскуолаҕа капитальнай өрөмүөн бара илигин, канализация турбалара эргэрбитин, уларыйыан наадатын эттэ.
***
Икки нэһилиэккэ Степан Анатольевич үлэтин хайҕаан туран, сөптөөҕүнэн сыаналаатылар. Үлэ бара турарын көрө-истэ, билэ сылдьалларын, астыналларын бэлиэтээтилэр. Инникитин да сайдыы барарыгар эрэллээхтэрин биллэрдилэр.
Елена Макаринская