Алаҕартан Николай Лыткин:
- Сайылыкка бастакы сылларбар 100 ыанар ынаҕы таһаарар этим – бэйэм 50-ну уонна 50-ну ыаллартан хомуйан. Билигин кэргэмминээн сааһыран, 20-тэн тахса ыанар ынаҕы таһаарабыт. Тыа хаһаайыстыбатыгар үлэлээбитим тухары үлэм сыанабыла элбэх, үлэһит дьону өрөспүүбүлүкэ да, улуус да өйүүр, көмө баар. Билигин сайылыктааһын аҕыйаан иһэр, сүөһүнү аччатыы барар. Онон эдэрдэргэ аҕыйах да сүөһү буоллаҕына, кыра сайылыгы туттан, дьиэ кэргэнинэн сайылааҥ диэн этэбин – сайылыкка ынах үүтэ элбиир.
Соловьевтан Виктор Петров:
- 2013 сыллаахтан хаһаайыстыба тэринэн үлэлиибин. Бүгүҥҥү туругунан, кыстыгы 140-ча сүөһүнү туораттыбыт. Ыам ыйын 7 күнүгэр сайылыкпытыгар көспүппүт. Бу сайылыкпытыгар төрдүс сылбытын тахсабыт, эргэ быраҕыллыбыт дьиэлэри сөргүтэн олоробут. Бэйэм тыа хаһаайыстыбатын таһынан, атыынан-эргиэнинэн, улахан уйуктаах массыыналарынан тиэйии-таһыы өҥөтүнэн, пиломатырыйаалларынан эбии дохуоту киллэринэбин. 17 киһини үлэнэн хааччыйан, хамнастаан олоробут. Улууспут баһылыгар Степан Анатольевичка махтанабын, кини тыа хаһаайыстыбатын олуһун өйүүр, онон санаабыт бөҕөх.
Иван Парфенов, “Комплекс” бааһынай хаһаайыстыба:
- Хаһаайыстыбабыт 350-ча ынах сүөһү, 120-тэ ыанньык сүөһү, 157 биэ, 255 сылгы ахсааннаах. Бүгүн саҥа туттубут сайылыкпытыгар көстүбүт. Сайылыкпытын Дьиэ кэргэн Гранынан тутуннубут, 15 мөлүйүөн суумалаах. Гран ирдэбилигэр сайылыгы оҥоруу, тиэхиньикэни ылыы, кыстык хотону саҥардыы, оборудованиеларын саҥардыы киирэр. Ону барытын оҥорон, отчуоттаан олоробут. Саамай үөрэрбит диэн – сайылыкпытын, титиикпитин саҥардан биэрдибит, аныгылыы технологияны киллэрэн, 12 ынаҕы биирдэ ыыр молокопроводнигы тартыбыт, онон үүт тутатына охладительга түһэр буолар. Билигин 80 ынах төрөөтө, өссө да төрүөхтэрэ. Сыллааҕы үүппүт былаана – 300 туонна. Билигин күҥҥэ 800 сэнтиниэри ыыбыт, бэс ыйыттан туоннаттан таһаарыахпыт, онон былааммыт туолуоҕа.
Елена Макаринская