Саха сирин үрдүнэн РФ Бэрэсидьиэнин үс күннээх быыбара саҕаланна. Дьокуускай бириэмэтинэн 08:00 чааска, Чурапчы улууһугар бары быыбардыыр учаастактар аһылыннылар.
Киин быыбардыыр хамыыһыйа түөрт хандьыдааты быыбарга кыттарга аһардыбыта: судаарыстыбаҕа баһылыктаан олорор Владимир Путин бэйэ туруорунуутунан, КПРФ-тан Николай Харитонов, ЛДПР-тан Леонид Слуцкай уонна «Новые люди» баартыйаттан Владислав Даванков.
“Чурапчыбыт улууһугар 29 быыбардыыр учаастак барыта 8 чааска туох даҕаны хойутааһына суох аһылыннылар, үлэлэрэ саҕаланна, өрөгөй ырыата ньиргиччи тыаһаата. Уопсастыбаннай көрөөччүлэр итиэннэ ис дьыала уорганын үлэһиттэрэ бары миэстэлэригэр бааллар, сокуону кэһии, үҥсүү киирбэтэ”, — диэн Чурапчы улууһун Киин быыбардыыр хамыыһыйатын сэкирэтээрэ Виктория Деллохова-Никитина иһитиннэрдэ.
Саха сиринээҕи Киин быыбардыыр хамыыһыйа иһитиннэрэринэн, 2024 сыл тохсунньу 1 күнүнээҕи туругунан эрэгийиэҥҥэ 638 429 быыбардааччы регистрацияламмыт:
- 18–35 саастаах – 33%;
- 36–59 саастаах — 43%;
- 60 уонна онтон үөһэ саастаах – 24%.
Өрөспүүбүлүкэҕэ анаан 641 600 быыбардыыр бүллүтүөнү бэлэмнээбиттэр. Оттон 13372 быыбардааччылаах оройуоҥҥа, биир бастакынан быыбардыыр учаастак боруогун улуус Аҕа баһылыга Степан Анатольевич Саргыдаев атыллаата.
Манна даҕатан эттэххэ, кулун тутар 15-17 күннэригэр өрөспүүбүлүкэ үрдүнэн 811 быыбардыыр учаастакка быыбардааччылар куоластарын биэриэхтэрэ.
Сэмэн Жендринскэй