СӨ Олох-дьаһах хомунаалынай хаһаайыстыбатын Чурапчы улууһугар филиалын дириэктэрэ Георгий Александров иһитиннэрбитинэн, улууска оттук сезона балаҕан ыйын 6 күнүттэн кыралаан саҕаланар. Балаҕан ыйын 7 күнүттэн бары эбийиэктэргэ сылааһы биэриини саҕалыахтара.
Балаҕан ыйын кытта олохпут биир дьоһун кэрдииһэ саҕаланар. Ол эбэтэр уһун кыһыны сылаастык туоруур оттукпут сезона бастакы хардыыларын оҥорор. Билиҥҥи туругунан Чурапчы улууһун итиинэн хааччыллыы ситимэ быстыбатын туһугар 331 үлэһиттээх СӨ олорор дьиэ уот-уот, хомунаалынай хаһаайыстыба судаарыстыбаннай унитарнай тэрилтэ Чурапчытааҕы салаата үлэлиир.
Быйыл Чурапчы улууһугар уопсайа 35 хочуолунай сылааһы биэриигэ үлэлиэ. Бу туһунан ОДЬКХ Чурапчытааҕы филиалын дириэктэриттэн Георгий Александровтан туоһуластыбыт: “Ити 35 хочуолунайбытыттан 8-һа гаас, биир убаҕас оттугунан уоннааҕы 26 хочуолунай чоҕунан оттуллаллар. 141.181 биэрэстэ усталаах итиини биэрэр тыраасса баар, күн-бүгүн үлэлииргэ барыта бэлэм турар. Кыстыкка 97% бэлэммит диэххэ сөп. Эрдэ этиллибитин курдук саҥа хочуолунайы Хадаар нэһилиэгэр тутан саҕалаан эрэбит оттон Үрэх Күөрэ учаастагар тутуу балаҕан ыйыттан саҕаланыаҕа. Быйыл үгүс ыал гааска холбоноллорунан сибээстээн, киин итииттэн 361 ыалы араардыбыт, ол иһигэр Хатылы нэһилиэгэ уонна Үрүҥ Күөл 100%. Хапытаалынай өрөмүөн үлэ 94% түмүктэннэ.
Итини сэргэ Уһун Күөл, Алаҕар, Бахсы, Төлөй, Болугур нэһилиэктэригэр ититии барар тыраассатын өрөмүөнэ барда, үс биэрэстэттэн ордук уһуннаах тыраасса оҥоһулунна. Алаҕарга, Кытаанахха икки оһох уларыйда. Болугурга, Алаҕарга, Кытаанахха, Төлөйгө, Мэлдьэхсигэ, Чурапчыга барыта 9 оһох хапытаалынай өрөмүөнү аастылар. Болугурга уонна Уорҕаҕа 3 хочуолунай электрическай боруобата 100% уларыйда. Манна даҕатан эттэххэ “Технологическое присоединение” бырагыраамма чэрчитинэн Болугурга элбэх кыбартыыралаах дьиэ уонна Бахсыга норуот айымньытын дьиэтэ киин итиитигэ холбонор. Итини таһынан “Подключение частного сектора” бырагыраамманан Уорҕаҕа уонна Болугурга – 10 дьиэ эбии холбоноро былааннанар. Үлэбит итинэн эрэ түмүтэммэт анал байыаннай дьайыы кыттыылаахтарын дьиэ кэргэттэрин ититиигэ холбооһун үлэлэрэ Болугурга, Соловьевка ыытылла тураллар”, — диэн Георгий Степанович кылгастык билиһиннэрдэ.
Сэмэн Жендринскэй