Бу өрөбүллэргэ «Сounter strike 2» диэн көмпүүтэр оонньуутун сэҥээрээччилэрин түмэр саҥа дьыллааҕы турнир буолла. Күрэх Чурапчы улууһун ыччатын Сэбиэтин чилиэнэ Сарыал Сивцев көҕүлээһининэн, улууска саҥа аһыллыбыт «Game_Club» (тыл. «Игровой клуб») компьютернай кулуупка ыытылынна.
Турнирга барыта 21 ыччат кытынна. Уопсай түмүгүнэн бастакы миэстэни «ENIGMA» Чурапчы оскуолаларын үөрэнээччилэрин хомуур хамаандата ылары ситистэ. Иккис миэстэ «ОТГ-141» Чурапчытааҕы успуорт үнүстүүтүн устудьуоннарын хамаандата, үһүс миэстэ «Serfsss»Чурапчы оскуолаларын үөрэнээччилэрин холбоһуктаах хамаандата буоллулар.
«ENIGMA» хамаанда
«ОТГ-141» хамаанда
«Serfsss» хамаанда
Кыайыылаахтар бары грамотанан, мэтээлинэн уонна «Игровой клуб» сэртипикээттэринэн наҕараадаланнылар.
Бэлиэтээн эттэххэ, «Игровой клуб» ааспыт ый бүтүүтэ аһыллан, ыччат түмсүүтүн кытта ситимнээхтик үлэлээн эрэр. Саҥа тэрилтэ хаһаайыттарынан эдэр ыал Николай Захаров уонна Анна Саввинова буолаллар. Кинилэри кытта быйыл социальнай хантыраагынан туһаммыт Чурапчы ыччата Михаил Оконешников үлэлиир.
Тэрийээччилэр санааларынан, маннык хабааннаах тэрээһиннэр хамаандаҕа үлэлииргэ, бэйэ бэйэни өйөөһүн курдук хаачыстыбалары сайыннарарга улахан суолталаах.
— Киберспортивнай күрэххэ ыччаттар мустан, оонньуур үөрүйэхтэрин көрдөрөллөр, сомоҕолоһоллор. Бүгүҥҥү турнирга кыттааччылар хамаанданан «Сounter strike 2» оонньоотулар. Бу оонньуу тактикалыыр, ырыҥалыыр сатабылы сайыннарар. Маны сэргэ турнир иллэҥ кэми холку эйгэҕэ атаарарга, бэйэ — бэйэни кытта сибээһи бөҕөргөтүүгэ үчүгэй ньыма буолар, — диэн Сарыал Сивцев эттэ.
Маны таһынан кыттааччылар оонньуурга толору усулуобуйа тэриллибитин бэлиэтээтилэр. Ол курдук, үрдүк кыамталаах компьютердар, хачыстыбалаах монитордар, сымнаҕас анал кириэһилэлэр, түргэн интернет ситимэ баар.
Марфа Петрова.
