Бүгүн о.э олунньу 28 күнүгэр Саха Өрөспүүбүлүкэтигэр Доруобуйа национальнай күнэ бэлиэтэнэр.
Бу күнү 2000 сыллаахха өрөспүүбүлүкэ бастакы бэрэсидьиэнэ Михаил Николаев хас биирдии дьиэ кэргэҥҥэ, үлэ кэлэктииптэригэр уонна өрөспүүбүлүкэҕэ чөл олоҕу түстүүр туһугар уонна XXI үйэҕэ норуот уйгутун үрдэтиигэ духуобунай, майгы-сигили уонна эт-сиин доруобуйатын бастакы суолталаах оруолун билинэн туран бигэргэппитэ.
Бэлиэтээн эттэххэ, судаарыстыбаннай бэлиитикэ сүрүн докумуона – Чөл олох доктрината. Нуорма-быраап баазата, успуорду уонна чөл олоҕу сайыннарарга усулуобуйалар оҥоһуллубуттара. Биир кэлим үлэ түмүгэр төрөөбүт өрөспүүбүлүкэлэрин сайыннарар күүстээх, өйдөөх, доруобай көлүөнэ улааппыта.
Арассыыйаҕа Дьиэ кэргэн уонна Саха өрөспүүбүлүкэтигэр Оҕо саас сылыгар Доруобуйа харыстабылын министиэристибэтэ олунньу 26 күнүттэн саҕалаан кулун тутар 6 күнүгэр диэри Саха сиригэр доруобуйа харыстабылын национальнай күнүн иитинэн дэкээдэ биллэрэн ыытан саҕалаабыта.
Дэкээдэҕэ нэһилиэнньэ доруобуйатын дьаарбаҥката, мэдиссиинэ тэрилтэлэринэн аһаҕас аан күннэрэ, араас ыарыылар кутталы үөскэтиилэрин туһунан иһитиннэриилэр, чөл олоҕу тутуһуу тосхоллоро, Арктика улуустарыгар “Мобильнай быраас” биригээдэ десана, оскуола үөрэнээччилэригэр доруобуйа уруоктара, доруобуйа оскуолалара, о.д.а. буола тураллар.
Бэҕэһээ о.э. олунньу 27 күнүгэр дэкээдэ иитинэн, Чурапчы улууһугар СӨ доруобуйа харыстабылын министиэристибэтин исписэлиистэрэ, өрөспүүбүлүкэ штаты таһынан кылаабынай терапевт-бырааһа Ульяна Портнягина, мэдиссиинэ профилактикатын тэрийии отделын сэбиэдиссэйэ Мария Чукрова, мэдиссиинэ профилактикатын тэрийии отделын методист-бырааһа Светлана Сыромятникова кэлэн үлэлээтилэр. Быраастар сүрүннээн, Чурапчы киин балыыһатын исписэлиистэригэр ыарыһахтары профилактическай көрүүлэригэр методическай көмөнү оҥордулар. Итиэннэ учаастактааҕы сулууспа хааччылыытын, докумуоннарын бэрибиэркэлээтилэр. Көрсүһүү иккис түһүмэҕинэн үлэһиттэргэ аналлаах сэминээр тэрилиннэ, манна тирээн турар боппуруостары иһиттилэр, методическай сүбэлэри бэрдилэр.
Ити күн кинилэри сэргэ Чурапчы улууһугар, Дьокуускайдааҕы ЯРКВД тирии уонна сыстыганнаах ыарыылары утары профилактикалыыр отдел сүрүннүүр исписэлииһэ Альбина Николаева салайааччылаах, алта киһилээх үлэлиир бөлөҕө, икки хайысханан Дмитрий Коркин аатынан ыспартыыбынай интэринээт-оскуолаҕа 400-кэ үөрэнээччини уонна Прокопий Сокольников аатынан Чурапчы киин балыыһатыгар 20-чэ ыарыһаҕы хабан көрдүлэр-иһиттилэр. Түгэнинэн туһанан, Чурапчытааҕы киин балыыһа салалтата бэҕэһээҥҥи күн ыалдьыттарыгар улахан көмөлөрүн, сүбэлэрин-амаларын иһин дириҥ махталларын тириэрдэллэр.
Санаттахха, СӨ Ил Дархана Айсен Николаев уурааҕынан 2021-2030 сылларга Саха Сиригэр Доруобуйа уон сыла биллэриллибитэ. Ил Дархан этэринэн, бу сыллар усталарыгар дойду үрдүнэн өрөспүүбүлүкэ саамай уһун үйэлээх эрэгийиэннэр ахсааныгар киириэхтээх. Үрдүкү салалта үлэтэ нэһилиэнньэ олоҕор табыгастаах уонна чэбдигирдэр эйгэни тэрийиигэ, мэдиссиинэ көмөтүн хаачыстыбатын үрдэтиигэ туһуланыахтаах.
Сэмэн Жендринскэй