«Айылгы» норуот айымньытын дьиэтигэр улууска биллэриллибит Ыал саргытын сылын түмүктүүр дьиэ кэргэн форума үрдүк таһымнаахтык ыытылынна.
Форум сүрүн чааһыгар улуус баһылыга Степан Саргыдаев дьаһал кыттыылаахтарын эҕэрдэлээн туран, ааһан эрэр сыл кэккэ ситиһиилэрин сырдатта. Кини тус этиитигэр: «Киһи дойдуга бэриниилээх буолуута, төрүт культураны, үгэһи илдьэ сылдьыыта, төрөөбүт тылынан саҥарыыта дьиэ кэргэнтэн саҕаланар. Бу өйдөбүлгэ олоҕуран дойдубут, өрөспүүбүлүкэбит, улууспут салалтата сөптөөх кэмҥэ дьиэ кэргэн бэлиитикэтин бөҕөргөтүүгэ, үгэс буолбут сыаннастары тарҕатыыга туһуламмыт анал сыллары биллэрэн, быйылгы үлэбит үтүө түмүктэрдээх буолан эрэр”, — диэн бэлиэтээтэ.
Үөрүүлээх быһыыга-майгыга улуус баһылыга Степан Саргыдаев уонна улуус дьокутааттарын Сэбиэтин бэрэссэдээтэлэ Яков Оконешников дьиэ кэргэн бэлиитикэтин сайыннарыыга кылааттарын иһин, оҕолорун дьоһун дьон гына иитэн таһаарбыт Сылаҥ нэһилиэгиттэн Алексей уонна Елена Сивцевтэргэ уонна Чурапчы нэһилиэгиттэн Николай уонна Марфа Романовтарга «СӨ Дьиэ кэргэн килбиэнэ” туйгун бэлиэни туттардылар.
Ону сэргэ Романовтар дьиэ кэргэн уонна Чакыр нэһилиэгиттэн Софрон уонна Тамара Михайловтар быйыл кыһыл көмүс сыбаайбаларын бэлиэтээбиттэринэн, Чурапчы нэһилиэгиттэн Лидия уонна Спартак Слепцовтар бииргэ өйдөһөн, өйөһөн олорбуттара 60 сылын туолбуттарынан улуус баһылыгын анал сэртипикээттэрэ ананнылар.
Маны таһынан быйыл бастакы оҕолорун оҕоломмут ыалларга Чурапчы нэһилиэгиттэн Сергей уонна Степанида Слепцовтарга 50 тыһ. суумалаах сэртипикээти туттардылар.
Салгыы Ыал саргытын сылыгар ыытыллыбыт алта дьаһал — «Дьарыктаах дьоһун ыал», «Төрүт үгэс түмэр күүһэ», «Чөл туруктаах ыал», «Ааҕар саха сайдам ыала», «Силистээх сис ыал», «Ыччат ыал тэрээһиннээх тиэргэнэ» дьиэ кэргэн куонкурустарын кыайыылаахтарын чиэстээтилэр.
Марфа Петрова.