Бу туһунан, Чурапчы улууһун Аҕа баһылыгын Саргыдаев бүгүҥҥү о.э. муус устар 15 күнүнээҕи 829 нүөмэрдээх дьаһала таҕыста. Степан Анатольевич өссө ааспыт сырыыга, “Байанай күрэҕин” улуустааҕы түһүмэҕин арыллыытыгар: “Бастакы көҕөнү бултаабыт булчукка – биир дьааһык ботуруон туттарыахпыт”, — диэн биллэрэн турардаах.
“Бастакы көҕөн-2024” улуустааҕы булчуттар икки ардыларынааҕы куонкурус балаһыанньатын билиһиннэрдэххэ маннык:
- булчут 18-тан үөһэ саастаах буолара ирдэниллэр;
- көҕөн Чурапчы улууһугар бултаммыт буолуохтаах;
- булчут саатыгар, иитиэх куһугар хайаан даҕаны көҥүллээх буолуохтаах;
- көҕөнүн чахчы бэйэтэ ыппытын туоһулуур, ыйын, күнүн, бириэмэтин, сирин ыйан туран биидьийэҕэ эбэтэр хаартыскаҕа устубут буолуохтаах;
- булчут куһун тэрийэр хамыыһыйаҕа аҕалан көрдөрүөхтээх;
- куонкуруска былырыын өлөрүллүбүт көҕөн эбэтэр иитиэх кус кыттыыны ылбат;
- көҕөн куонкуруһун болдьоҕо 2024 сыл муус устар 25-тэн 30-с күнүгэр диэри ыытыллар.
Билсэр итиэннэ биидьийэ-матырыйааллары ыытар төлөпүөҥҥүт нүөмэрэ: 89241783388.
Кыайыылааҕы тэрийэр хамыыһыйа бэйэтэ быһаарыаҕа, өскөтүн көҕөнү бултааччылар бириэмэлэринэн, күннэринэн тэҥнэһэн тахсар түгэннэригэр кус ыйааһына уонна төһө бөдөҥө учуоттаныаҕа диэн этиллэр.
Дьүүллүүр сүбэ бэрэссэдээтэлинэн Степан Саргыдаев ананна, бэрэссэдээтэл солбуйааччытынан Егор Сивцев, чилиэттэринэн улуус дьокутааттарын Сэбиэтин бэрэссэдээтэлэ Яков Оконешников, улуус баһылыгын солбуйааччы Алексей Лобанов, Чурапчы улууһунааҕы биир кэлим сакаастыыр сулууспа дириэктэрэ Борис Архипов, Чурапчы улууһун баайга-дуолга управлениетын кэмитиэтин бэрэссэдээтэлэ Рустам Данилов, Чурапчы улууһунааҕы биир кэлим диспетчерскэй сулууспа начаалынньыга Иван Хоютанов, Чурапчы улууһун булчуттарын бэдэрээссийэтин бэрэссэдээтэлэ Алексей Егоров үлэлиэхтэрэ.
Сэмэн Жендринскэй