Дойдубут сырдык сарыалыгар куустаран олорон элбэҕи эргитэ саныыбыт… Күннэтэ үүнэ, сайда, чэчирии турар Чурапчыбыт улууһун бүгүҥҥүтэ барыбытын олус үөрдэр уонна долгутар. Үөрдэр элбэх таас тутууларынан, долгутар сомоҕолоһуутунан, сайынын кыраһыабай сибэккилэринэн киэркэйэринэн, үөрэххэ, үлэҕэ, успуорка үгүс ситиһиилэринэн…
Улууспутугар биир сайдар салаанан тутуу буолар. Тутуу уопсай үлэтигэр быйыл, хаһааҥҥытааҕар да элбэх, атын гражданстволаах омук дьоно кэлэн үлэлии сылдьалларын туһунан Чурапчытааҕы миграционнай пуун начаалынньыгын солбуйааччы Саргылаана Никифорова иһитиннэрэр.
— От ыйын 24 күнүттэн саҕалаан СӨ Ис дьыалаҕа уорганын 1/289р уонна 191 бирикээстэригэр олоҕуран Чурапчытааҕы полиция отделын иһинэн “Фиктивная регистрация” уонна “Нелегальный мигрант” диэн оперативнай-профилактическай тэрээһиннэр ыытылла тураллар. Бүгүҥҥү күн туругунан, Чурапчы улууһугар барыта холбоон 8 улахан тутуу үлэтэ ыытылла турар, эбийиэктэргэ уопсайа холбоон 101 атын дойдуттан кэлбит омук бэрэбиэркэлэннэ. Тутааччылар бука бары бириэмэтигэр учуокка турбуттар, кэлбит бириэмэлэриттэн саҕалаан уопсастыбаннай бэрээдэги кэһии тахсыбата. Атын омуктары үлэлэтэ аҕалбыт дуоһунастаах сирэй, Арассыыйа иһигэр эрдэттэн учуокка туруоран баран, Чурапчы улууһугар кэлбит үлэһитин үс күн иһигэр миграционнай пуун учуотугар туруорбат тугэнигэр, административнай кодекс 18.9 ыстатыйатын 4 чааһыгар сигэнэн, 200 тыһ.солк сууммаҕа ыстарааптаныан сөбүн туһунан өссө төгүл санатабыт. Эбэн эттэххэ 109 нүөмэрдээх Бэдэрээлинэй сокуон чэрчитинэн бэрэбиэркэ үлэтэ салгыы ыытыллар, — диэн полиция капитана ситэрэн биэрдэ.
Сэмэн Жендринскэй