Чурапчы спортсменнара «Азия оҕолоругар» 7 мэтээли ыллылар

Дьокуускайга бэс ыйын 25 — от ыйын 7 күннэригэр VIII норуоттар икки ардыларынааҕы «Азия оҕолорун» спортивнай оонньуулара киэҥ далааһыннаахтык ыытылла тураллар. Барыта 24 көрүҥҥэ 3000-тан тахса спортсмен кыттар. Чурапчыттан 35 оҕо көҥүл тустууга, волейболга, чэпчэки атлетикаҕа, остуол тенниһигэр, атах оонньууларыгар уонна «Азия оҕолоругар» киирбит саҥа көрүҥнэргэ – «Алыш» курдаһан тустууга, «Го» өй оонньуутугар ситиһиилээхтик кытта сылдьаллар.

Хатылыттан төрүттээх 15 саастаах Изот Кривошапкин теннискэ парнай разрядка Павел Романовскайдыын Москва сүүмэрдэммит хамаандатыгар кыһыл көмүс мэтээли аҕаллылар. Ону сэргэ Изот биирдиилээн киирсиигэ боруонса мэтээли ылары ситистэ. Кинини түөрт сааһыттан 12-гэр диэри аҕата Геннадий Кривошапкин дьарыктаабыт. Талааннаах спортсмен билигин Москваҕа 1 №-дээх Олимпийскай резервэ училищетыгар үөрэнэр. Быйыл Арассыыйаҕа бастыыр иһин күрэххэ кыайыылаах аатын ылан, саха тенниһин историятыгар киирбитэ.

Мырыла оскуолатын үөрэнээччитэ Марк Никитин Саха сирин бастакы хамаандатын састаабыгар киирэн, атах оонньууларыгар үс үрүҥ көмүһү ылла. Ол курдук, кылыыга 2-с, куобахха 2-с, ыстаҥаҕа 4-с уонна троеборьеҕа 2-с буолла. Кэскиллээх спортсмен Өлүөхүмэттэн төрүттээх, былырыын Чурапчыга кэлэн Иван Чиркоевка дьарыктанан саҕалаабыт. Марк 7 сааһыттан бу спорт көрүҥэр сөбүлээн дьарыктанар. Билигин 15 саастаах. Кыайыытын доҕотторугар, учууталларыгар, тириэньэрдэригэр, чугас дьонугар уонна эбээлэригэр аныыр, киниэхэ ыалдьыбыт бары дьоҥҥо махтанар. Инникитин өссө үрдүк көрдөрүүлэри ситиһэргэ эрэллээх.

Д.П.Коркин аатынан Чурапчытааҕы успуорт интэринээт-оскуола 8 кылааһын үөрэнээччитэ Никифор Семенов көҥүл тустууга 48 киилэҕэ тустан, кыһыл көмүс мэтээли Уһук Илин федеральнай уокурук хамаандатыгар аҕалла. Никифор Эдьигээнтэн сылдьар, Чурапчытааҕы успуорт оскуолатыгар 6-с кылаастан ситиһиилээхтик үөрэнэр. Кини тириэньэрэ Виталий Корякин буолар. Бу «Азия оҕолоругар» бэлэмнэнэн күүстээх дьарыктаныыны ааспыттар. Оонньуулар саҕаланыахтарын аҕыйах хонук иннинэ сборданан кэлбиттэр. Эдэр бөҕөс кыайыытын тириэньэригэр, чугас дьонугар уонна доҕотторугар аныыр. «Баҕа санаам туолла. Бастаатым. Кыайыыга эрэллээх этим. Барыта үчүгэй, үчүгэйдик ааста», — диэн Никифор үөрүүтүн үллэстэр.

Чурапчыттан волейболга Саха сирин састаабын хамаандатыгар кыргыттарга Арыйаана Коркина, Арина Бродникова, Туйаара Попова, Марианна Давыдова уонна уолаттарга Андрей Баранкевич киирэн, күрэхтэстилэр. «Уопсайа түөртэ оонньоотубут. Бэйэбит бөлөхпүтүгэр үһүс миэстэ буолан, Уһук Илин уокуругун хамаандатын кытта бэһис миэстэни былдьастыбыт. Хомойуох иһин, кыайыыны ситиспэтибит. Кыргыттар кыһаллан туран, толору кыахтарынан кииристилэр. Онон төһө да хотторбуппут иһин, «Азия оҕолорун» оонньуулара умнуллубат, үчүгэй өйдөбүллэри, саҥа уопуту хаалларда», — диэн кыргыттар тириэньэрдэрэ Саргылана Оконешникова күрэх кэнниттэн тус санаатын үллэһиннэ.

Го өй оонньуутугар Саха сирин иккис хамаандатын С.А. Новгородов аатынан Чурапчы орто оскуолатын 5-с кылааһын үөрэнээччилэрэ Нарыйа Седалищева уонна Анастасия Фомина көмүскээтилэр. Кинилэри сэргэ Дьокуускайдааҕы ИТ-куб иитиллээччилэрэ Артем Степанов уонна Андрей Демидов кытыннылар. Кыргыттары энтузиаст тириэньэр Надежда Захарова дьарыктыыр. «Хамаанданан киирсиигэ 5-с миэстэ буоллубут. Манна Настя үчүгэйдик оонньоон, 3:1 очукуонан Сибиирдээҕи уокурук хамаандатын кыайдыбыт. Онон хамаанданан киирсиигэ сыалбытын ситистибит. Паарнайга да, оҕолор куһаҕана суохтук оонньоотулар. Нарыйа биирдиилээн киирсиигэ ордуктук оонньоото. Кыайыыга, биллэн турар, кыах суоҕа. Тоҕо диэтэр, биһиги оҕолорбут 3,4,5 даннаах (рангалаах) оонньооччулары кытта күөн көрүстүлэр. Кыргыттар быйылгыттан саҥа дьарыктаналлар. Онон бэйэлэрин таһымнарыгар достуойунайдык кытыннылар, судьуйабыт добуолунай. Бу оонньууларга кыттан эбии уопутурдубут, мотивацияланныбыт», — диэтэ Надежда Гаврильевна.

«Триумф» спортивнай комплекска «Алыш» курдаһан тустууга финал ыытылынна. 60 киилэҕэ «Саха-1» хамаандатыттан Чурапчы оҕото Данил Пинигин тустан,  бочуоттаах иккис миэстэни ылары ситистэ. Данил Д.П.Коркин аатынан Чурапчытааҕы успуорт  интэринээт оскуолаҕа 9 кылааска үөрэнэр. Кини 5 кылаастан тустуунан сөбүлээн дьарыктанар. Быйылгыттан алышка тириэньэр Михаил Явловскайга үөрэнэр. Бэлиэтээн эттэххэ, бу көрүҥ  «Азия оҕолоругар» аан бастакытын ыытыллар.

«Азия оҕолорун» кыайыылаахтарын үрдүк ситиһиилэринэн истиҥник эҕэрдэлиибит. Бары кыттааччыларга өссө дьаныардаахтык дьарыктанан, үрдүк чыпчаалга дабайалларыгар баҕарабыт.
Марфа Петрова