Кулун тутар 26 күнүгэр, Нам улууһун Ньургун Тимофеев аатынан култуурунай-ыспартыыбынай успуорт уораҕайыгар “Спортивные якутяне” үөрэнээччилэр ыспартакыйаадаларын суотугар киирэр “Сааскы Эҥсиэли” кикбоксиҥҥа Саха сиригэр бастыыр иһин күрэхтэһии ыытылынна.
Күрэхтэһии сүрүн судьуйатынан, Арассыыйа категориялаах судьуйа Иван Марков үлэлээтэ. Эдэр ыспарсымыаннары Нам улууһун баһылыга Филипп Николаев, СӨ кикбоксиҥҥак бэдэрээссийэтин дириэктэрэ Николай Слепцов, “Юные якутяне” өрөспүүбүлүкэтээҕи киин успуорт салаатын начаалынньыга, биир дойдулаахпыт Николай Гуляев, СӨ успуорт резервэтин бэлэмниир киин дириэктэрин солбуйааччы Виктор Громов, Нам улууһун үөрэҕин управлениетын начаалынньыга Мария Игнатьева эҕэрдэлээтилэр.
Чурапчы улууһа бу күрэхтэһиигэ 20 ыспарсымыаны илдьэн күрэхтэһиннэрдэ, бука бары 0.5 баалы биэрбиттэрин түмүгэр, Чурапчы улууһун хамаандата бэйэтин бөлөҕөр эрэллээхтик 1 миэстэни онтон уопсай сочуокка бочуоттаах 3-с миэстэни ылары ситистэ.
Манна, Семен Новгородов аатынан Чурапчы 6-с кылааһын үөрэнээччитэ Максим Собакин – өрөспүүбүлүкэ чөмпүйүөнүн үрдүк аатын ылла. Кинини сэргэ Чурапчыттан Эрсан Кузьмин, Хадаар нэһилиэгиттэн Чаҕыл Собакин, Тимур Гаврильев үрүҥ көмүс мэтээли итиэннэ Хадаартан Руслан Тарасов, Чурапчыттан Зоригто Максимов боруонса мэтээли ылары ситистилэр. Эдэр ыспарсмыаннар тириэньэрдэринэн Николай Сивцев, Николай Павлов, Мичил Адамов буолаллар.
Сэмэн Жендринскэй