Соторутааҕыта Чурапчы сэлиэнньэтин ,,Утум» дьиэтигэр ,,Үлэ киһитэ үйэлэргэ чиэстэнэр» диэн нэһилиэк Бочуоттаах гражданиннарыгар анаммыт чиэстээһин уочараттаах түмсүүтэ буолла. Бу бырайыагы Наталья Захарова быйылгы Үлэ сылыгар анаан толкуйдаан үлэлэтэр.
Бу сырыыга чиэстээһиҥҥэ-бочуоттааһыҥҥа тыыл уонна СӨ авиациятын бэтэрээнэ Николай Дыдаев, РСФСР норуотун үөрэҕириитин туйгуна Валентина Иустинова, РФ үөрэҕириитин үтүөлээх үлэһитэ, РФ бочуоттаах учуутала Мария Хоютанова, «Якутскэнерго» АК бэтэрээнэ, «Россия профсоюһун 100 сыла» мэтээл хаһаайына Владимир Максимов кытыннылар.
Кинилэр бэйэлэрин үлэлэрин сиһилии билиһиннэрдилэр, ыйытыыларга эппиэттээтилэр. Нэһилиэк салалтатыттан, үлэлээбит тэрилтэлэриттэн
эҕэрдэлии кэлбиттэр
истиҥ-иһирэх тыллары эттилэр.
Үлэ маяктарыгар анаан ыллам ырыалар ылланнылар.
Алексей Слепцов