Чурапчы нэһилиэгэ төрүттэммитэ 375 сылыгар, бүгүн Ярославскай уулуссаҕа саҥа 50 кыбартыыралаах дьиэ үөрүүлээх аһыллыыта буолла. Саҥа дьиэ “Хаарбах туруктаах дьиэлэртэн көһөрүү” бырагырааматынан киирдэ.
Үөрүүлээх түгэҥҥэ улуус баһылыга Степан Саргыдаев, СӨ Тутуу миниистирин солбуйааччыта Евгений Афанасьев, Чурапчы нэһилиэгин баһылыга Владимир Сивцев, «Сахастройгруп» ХЭТ генеральнай дириэктэрэ Иван Федулов эҕэрдэ тылы эттилэр, саҥа дьиэ ыраас, сылаас буоларыгар баҕардылар. Тутааччыларга наҕарадаалар туттарылыннылар.
Олохтоохтор ааттарыттан харда тылы Ольга Сивцева эттэ. Кини: “Саҥа дьиэҕэ киирбиппиттэн олуһун үөрэн турабыт. Маннык ыраас, сырдык дьиэлэммиппитигэр нэһилиэк, улуус дьаһалтатыгар уонна тутааччыларга улахан махталбытын тиэрдэбит. Чурапчыбыт күннэтэ сайда турарын бары көрө-билэ сылдьабыт. Өссө да саҥа тутуулар дьэндэйэ турдунар, Чурапчыбыт өрүү үүнэ-сайда, чэчирии турдун», — диэн эттэ.
Бэлиэтээн эттэххэ, “Хаарбах туруктаах дьиэлэртэн көһөрүү” бырагырааманан улуус үрдүнэн 2019-2025 сылларга 114 элбэх кыбартыыралаах дьиэ, ол иһигэр 671 кыбартыыра, 30382,67 кв м олорор сир хаарбах туруктааҕынан бэлиэтэнэн турар. 2019 сылтан Чурапчыга, Хадаарга, Сылаҥҥа, Соловьевка, Кытаанахха, Болтоҥоҕо, Төлөйгө, Хатылыга барыта 18 элбэх кыбартыыралаах дьиэ тутуллан үлэҕэ киирдэ. 455 кыбартыыра, 1267 олохтоох уонна 21095,4 кв м олорор сир көһөрүлүннэ.
2025 сылга диэри 216 кыбартыыра, 328 олохтоох, 9286,97 кв м көһөрө хаалла.
Елена Макаринская, Сэмэн Жендринскэй хаартыскалара