“Чурапчы нэһилиэгэ” тыа сирин түөлбэтин баһылыга Владимир Дмитриевич Сивцев ахсынньы 2 күнүгэр, “Үтүө санаа харыйата” аахсыйаҕа бастакынан кытынна.
Кини манна кырачаан оҕолор баҕа санааларын толордо.
“Саҥа дьыл диэн наһаа үчүгэй, истиҥ бырааһынньык. Оҕолор бука бары бу күҥҥэ туох эрэ дьиктини, кэрэни күүтэллэр уонна кинилэр бу күүтүүлээх бырааһынньыкка хайаан даҕаны бэлэх тутуохтаахтар”, — диир Владимир Дмитриевич.
“Үтүө санаа харыйата” Чурапчы нэһилиэгэр номнуо онус төгүлүн олус долгутуулаахтык, үөрүүлээхтик, өрө көтөҕүллүүлээхтик, ураты болҕомто ууруллан ыытыллар. “Киһи бэйэтэ харыйаттан талан ылар, онно оҕолор ааттара, баҕа санаалара сурулла сылдьар буолар. Инньэ гынан нэһилиэкпит кырачаан, дьиктини кэтэһэр оҕолоругар бэлэхтэри туттара сатыахпыт”, — диэн тыа сирин түөлбэтин баһылыгын социальнай боппуруостарга солбуйааччы Варвара Васильевна эбии быһааран биэрэр.
Владимир Сивцевы кытары аахсыйаҕа тыа сирин түөлбэтин баһылыгын 1-кы солбуйааччы Уйгулаан Туласынов, тыа сирин түөлбэтин баһылыгын социальнай боппуруостарга солбуйааччы Варвара Макарова кыттыстылар.
Владимир Дмитриевич оҕолорго кыһамньы уонна болҕомто мэлдьи ууруллуохтааҕын, Чурапчы улууһун, нэһилиэгин олохтоохторо маннык тэриллэр тэрээһиҥҥэ, харыйаҕа көхтөөхтүк кытта туралларыгар ыҥырда.
Чурапчы олохтоохторо быйылгы аахсыйаҕа турунан туран кыттыахтара. “Үтүө санаа харыйата” бөһүөлэккэ икки сиргэ туруорулунна.
Ол курдук, “Детский Мир” (Октябрьскай аатынан уулусса 30/1, 2 этээскэ), ону таһынан “Туйаара” (Лазарев аатынан уулусса 6 “а”, 2 этээскэ) атыы-эргинэ кииннэригэр тиийэн кыттыахха сөп.
Этиллибитин курдук “Үтүө санаа харыйата” аахсыйаҕа ким баҕарар кыттыан сөп. Оҕо аата суруллубут аккырыыккатын талаҕыт уонна киниэхэ Саҥа дьыллааҕы бэлэҕи оҥороҕут. Салгыы эстэпиэтэни бэйэтин чугас дьонугар, доҕотторугар ыытан манна кыттарга ыҥырар.
Сэмэн Жендринскэй