Ааспыт күһүн Арыылаах нэһилиэгин киин хочуолунайыгар эбии саҥа оһох туруоруллан, |“Хомустаах” уонна “Чараҥ” түөлбэтин ыаллара дьиэлэрин киин ититии ситимигэр холботтулар. Онон түөлбэ олохтоохторо саҥа дьылы сылаас дьиэҕэ көрсөн, үөрүүлэрэ, махталлара муҥура суох.
Чурапчытааҕы ОДьКХ Арыылаахтааҕы филиалын маастара Егор Сыромятников үлэ-хамнас тэрээһинин туһунан маннык сырдатта: “Бу күһүн үлэбитин эрдэттэн саҕалыахтаахпытын, матырыйаалбыт арыый хойутаан тиэллэн кэлэн, кыратык тардылынныбыт. Ону тэҥэ урукку эргэ турбалары саҥардыыга, синньигэһи суон турбаларга уларытыыга эмиэ хас да күммүт баранна. Ол эрээри туруоруллубут былааны толордубут. 21 дьиэҕэ ититии ситимэ тиийдэ. Нэһилиэкпит дьаһалтатын уонна улуустааҕы ОДьКХ-тын кытта дуогабардаһан, биригээдэбитигэр сүрүннээн 10-ча киһи солбуйса сылдьан үлэлээтэ”.
Хомустаах түөлбэтин олохтооҕо Федора Потапова өр сылларга олохтоох балыыһаҕа санитарканан үлэлиир. Дьиэтэ киин ититиигэ холбонон үөрүүтэ улахан: “Ититии ситимэ киирэн олус абыранныбыт. Сааһыран истэхпит аайы мас хайытыыта, оһох оттуута ыараан иһэр. Билигин үлэбиттэн сып-сылаас дьиэҕэ тиийэбин. Онон нэһилиэгим дьаһалтатыгар, баһылык Антон Андреевич Янцеҥҥа, өрөспүүбүлүкэбит туһааннаах салалтатыгар, Егор Егорович Сыромятников салайар ОДьКХ уонна биригээдэ бары үлэһиттэригэр махталбын тиэрдэбин”.
Оттон Чараҥ түөлбэ олохтооҕо Илья Иванович Туласынов бу нэһилиэккэ хачыгаарынан үлэлээбитэ 32 сыл буолла. Бу сыллар тухары дьонун-сэргэтин уйгулаах олоҕун туһугар – хас биирдии дьиэни, социальнай эбийиэктэри сылааһынан хааччыйаары утуйбатах уһун түүннэрин ааҕан сиппэккин. “Саппыкыта суох саппыһыкыт” дииллэринии, дьэ, саҥа саппыкыланным! Дьиэбэр сылаас киирэн, мин саҕа дьоллоох киһи суох”, — диэн үөрүүтүн үллэстэр: “Үйэм тухары оһох оттуутунан, маһы, чоҕу кытары “өрө тустубут” киһи дьэ абыранным. Үлэбиттэн кэлээт, аны дьиэбин оттор түбүгэр түһэрим. Онон тыа сирин олоҕун тупсарыыга далааһыннаах үлэни-хамнаһы тэрийэр нэһилиэгим, улууһум, өрөспүүбүлүкэбит туһааннаах салалталарыгар барҕа махталбын тиэрдэбин”.
Манна эбэн сырдаттахха, Арыылаах нэһилиэгэ үлэ-хамнас бары хайысхатыгар үтүө түмүктэри ситиһэн, 2024 сыл түмүгүнэн улууска бастыҥ нэһилиэктэр ахсааннарыгар киирэн, иккис бириистээх миэстэҕэ тигистэ. Арыылаахтар аны суолларын-иистэрин тупсарыыга ылсыахтара.
Анна Захарова.