Дьокуускайга «Цифровой Алмаз» федеральнай форум иһинэн «Я люблю Госпаблики» диэн сессия ыытылынна. Манна уһуйаан, оскуола, балыыһа уо.д.а. тэрилтэлэр пабликтарын администратордара кытыннылар
СӨ Ил Дарханын уонна Бырабыыталыстыбатын дьаһалтатын салайааччыта Георгий Михайлов эҕэрдэлээн туран, «Госпаблик амбассадора» бочуоттаах сэртипикээти биэс бастыҥ үлэһиккэ туттарда. Ол иһигэр «Вконтакте» социальнай ситимҥэ «Чуораанчык» уһуйаан сирэйин көхтөөхтүк, таһаарыылаахтык үлэлэтэр Августина Захарова наҕараадаланна.
Салгыы Регионы салайыыга Киин салайааччыта Василий Десяткин эҕэрдэлээн туран, 2023 сыл түмүгүнэн бастыҥ госпабликтары ааттаталаата. Манна уһуйааннар икки ардыларыгар «Алмазный госпаблик года» номинация кыайыылааҕынан «Чуораанчык» уһуйаан буолла.
Бастыҥ госпабликтар бэрэстэбиитэллэрэ социальнай ситимҥэ баар тэрилтэрин официальнай сирэйин хайдах үлэлэтэллэрин, чуолаан «Вконтакте» сыаһыарыыга ааҕааччылары, сурутааччылары элбэтиигэ туох ньымалары тутталларын билиһиннэрдилэр. Чурапчыттан «Чуораанчык» уһуйаан сэбиэдиссэйэ Августина Захарова кэлбит дьоҥҥо тус уопутуттан үллэһинэ. Кини саамай үрдүк көрдөрүүлээх — элбэх комментарийдаах, лайктаах, көрүүлээх публикацияларын холобур оҥорон, ырытта.
Маны таһынан сессияҕа уопуттаах экспердэр техническэй уонна тэрээһин чааһыгар тус кистэлэҥнэрин кэпсээтилэр, госпабликтар контеннарын хаачыстыбатын үрдэтэр туһунан туһалаах сүбэлэри биэрдилэр, ааҕааччылары, сурутааччылары элбэтиигэ саҥа ньымалары үөрэттилэр.
Паблик администратордара тэрилтэлэрин үлэтин хаачыстыбалаахтык, дьоҥҥо тиийимтиэтик сырдатарга саҥа билиилэри ылан, астыннылар.
«Чуораанчык» уһуйаан кэлэктиибин үрдүк ситиһиилэринэн эҕэрдэлиибит, инникитин да таһаарыылаах айар үлэни баҕарабыт.
Марфа Петрова.
Хаартыскалар «Пространство» платформаттан ылылыннылар.