Бу күннэргэ Чакыр нэһилиэгэр үөрүүлээх тэрээһин буолла. Биир дойдулаахпыт, Саха сириттэн бүтүн сойуус үрдүнэн уолаттарга бастакы чемпион бөҕөс Вячеслав Карповка анаммыт мусуой балаҕан акылаатын түһэрии сиэрэ-туома ыытылынна.
Төрөөбүт үөскээбит Чакырбыт,
Төлкөбүт, түөрэхпит биһигэ.
Сүдү Киһибит Эриликпит,
Сүрэхтээбит Дьаҕатын баһа.
Чакырым барахсан өҥ буора,
Чулуулар төрүүр биһиктэрэ.
Чакырдар үс хоһуун боотурбут,
Чахчы чыпчаалы дабайбыттара.
Халлааҥҥа харбаһар очуостар,
Хараҥа, дириҥ да далайдар.
Хоһуун санааҕа харгыс буолан,
Хаархапка мэһэй буолбаттара.
Көбүөр эйгэтэ , бөҕөс сүрэҕэ,
Кэлимсэ биир турук буолара.
Онно, кылбар бырахсыы араас,
Онно, үөскүүр «Карповтааһын» албас.
Улуу Ыстаалын удьуордара,
Уот төлөн сүрэхтээх Грузия.
Уон аҕыстаах уолу уруйдаан,
«Карпов, Карпов»…- диэн хаһыытаабыта…
Ытыктыыр киһибит, Убайбыт,
Ыҥырар сулустаах олоҕо.
Ыччакка холобур буолуоҕа,
Ынчыгы ырыанан бигиэҕэ.
Ааспыт олохпутун үйэтитэн,
Аартык аһабыт, кэскил анааран.
Бүгүн биһиэхэ Өрөгөй күнэ,
Бүгүн Карпов үйэлэргэ тилиннэ.
Албан аакка айгыраабат акылаат…
Туйгуннарга тулхадыйбат тулааһын…
Өрөгөй дьолуо өҕүллүбэт өһүө…
Үйэлэргэ өспөт номох буолуо…
Бу Иннокентий Адамов акылаат түһүүтүгэр анаан суруйбут хоһоонун РСФСР норуотун үөрэҕириитин туйгуна, «Учууталлар учууталлара» аат хаһаайына, СР спордун бэтэрээнэ, Чурапчы улууһун,Чакыр нэһилиэгин бочуоттаах олохтооҕо Николай Адамов мустубут дьон-сэргэ иннигэр аахта.
Бу күн нэһилиэк баһылыга Константин Лебедев, 90-с сылларга баһылыктаабыт, Арассыыйа бочуоттаах тутааччыта, Чурапчы улууһун, Чакыр, Хадаар нэһилиэктэрин бочуоттаах олохтооҕо Афанасий Кириллин, Чакыр нэһилиэгэр сэбиэтинэн үлэлээбит Егор Еремеев, Чакыр оскуолатын дириэктэрэ, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, СӨ үөрэҕириитин бочуоттаах бэтэрээнэ Александра Неустроева, өр кэмҥэ уһуйаан сэбиэдиссэйинэн үлэлээбит РФ үөрэҕэриитин туйгуна, «Гражданскай килбиэн» бэлиэ хаһаайына, СӨ үөрэхтээһинин бэтэрээнэ, Чакыр нэһилиэгин бочуоттаах олохтооҕо Варвара Еремеева эҕэрдэ тылларын эттилэр. Тэрээһиҥҥэ олохтоох нэһилиэнньэни тэҥэ Вячеслав Павлович уола Павел дьиэ кэргэнинээн кэлэн кыттыыны ыллылар.
Бу саҕаламмыт тутуу тиһэҕэр тириэрдиллэн үйэлээх, сырдык эйгэлээх, дьону түмэр уораҕай буоллун!
Наталья Сибирякова