Дьокуускай куоракка «Дохсун» спортивнай комплекска саха төрүт оҕунан ытыыга өрөспүүбүлүкэтээҕи «Байанай бэлэҕэ» чөмпүйэнээт ыытылынна.
Күрэххэ өрөспүүбүлүкэ араас муннуктарыттан барыта 322 киһи кытынна.
Чурапчы улууһун чиэһин 23 охчут ситиһиилээхтик көмүскээтэ. Ол курдук, 16 мэтээллээх кэллилэр.
Кыргыттар бөлөхтөрүгэр Лилиана Баишева «куобахха» уонна «куска» I-кы, «тииҥҥэ» II-с миэстэни ылан, үс көрүҥ түмүгүнэн кыайыылаах аатын сүктэ.
Уолаттарга Назар Сидоров «куһу» ытыыга III-с миэстэ, «тииҥи» ытыыга II-с миэстэ буолан, уопсайга бочуоттаах иккис миэстэни ылан үөрдэ.
Эр дьоҥҥо Барыс Баишев «куобаҕы» ытыыга III-c миэстэ, «тииҥи» ытыыга II-с миэстэ буолан, үс көрүҥ түмүгүнэн III-c миэстэ буолары ситистэ.
Маны таһынан эр дьоҥҥо Владислав Корякин «куобахха» II-c миэстэни, «куһу» ытыыга III-c миэстэни
ылан, үс көрүҥ түмүгүнэн кыайыылаахтан 1 эрэ очукуонан хаалан, II-c миэстэҕэ тигистэ.
Кэрэ аҥаардарга Эльвира Ефимова «куобах» уонна «тииҥ» көрүҥнэригэр бэргэн ытыыны оҥорон, тэҥнээҕин булбата. Онон үс көрүҥ түмүгүнэн бастакы миэстэни ылла.
Эдэр кэскиллээх охчут, 11 кылаас үөрэнээччитэ Айтал Баишев улахан дьон бөлөҕөр аан бастакытын кыттан, үчүгэй ситиһиилэри көрдөрдө.
Лилиана Баишева Саха сирин спордун маастарын нуорматын бэрт кыранан, 2 очукуонан толорбокко, «Спорт маастарыгар кандидат» ааты ылла.
Чурапчы охчуттарыгар өссө да ситиһиилэр кэлэ туралларыгар баҕарабыт.
Марфа Петрова