Саха сирин Киин быыбардыыр хамыыһыйата бэҕэһээҥҥи о.э балаҕан ыйын 9 күнүнээҕи иһитиннэриитигэр, өрөспүүбүлүкэ үрдүнэн куоластааччы уопсай ахсааныттан 34,36% ол аата 222015 киһи куоластаата.
Куоластааһыҥҥа саамай үрдүкү көрдөрүүлээх иккис күнүн Өлөөн улууһа иһэр (72,32%), кини кэнниттэн Анаабыр (60,59%), Үөһээ Бүлүү (60,25%), Горнай (57,45%), Таатта (51,53%) улуустара саппай уопсан иһэллэр. Онтон Чурапчы улууһугар бэҕэһээҥҥи күн түмүгүнэн 6726 киһи (46,37%) куоластаата. Ордук көхтөөх нэһилиэктэринэн – Арыылаах, Алаҕар, Төлөй, Хатылы, Хайахсыт ааттаталыахха сөп. Онтон баһылыктарын талыахтаах Төлөйгө 332 куоластааччы баарыттан 194 олохтоох кытынна (58,43%), Арыылаахха 249 куоластааччыттан билиҥҥи туругунан 147 киһи быыбардаата (59,04%). Үҥсүһүү, сокуон кэһиллиитэ тахсыбата.
Быыбар бүгүн үһүс күнэ. Чурапчы улууһугар 29 быыбардыыр учаастак сарсыарда 8 чаастан саҕалаан киэһэ 20 чааска диэри ааннарын тэлэччи астылар.
Чурапчытааҕы киин быыбардыыр хамыыһыйа иһитиннэрбитинэн, кэлиҥҥи икки күҥҥэ куоластаабыт бүлүтүөннэрин ууруната анал сейф-пакекка угуллан түүҥҥү өттүгэр сабыллар эбит. Биидьийэ уһулар сиригэр хараллыбыттар. Ис дьыала уоргаттарын үлэһиттэрэ хоно сытаннар харабыллыыллар.