Бүгүн, эбиэттэн киэһэ 14 чаастан өрөспүүбүлүкэ үрдүкү кылааһын үөрэнээччилэригэр аналлаах, үгэскэ кубулуйбут Ил Дархан харыйата Саха цииркэтин уораҕайыгар саҕаланыаҕа.
Бэҕэһээҥҥиттэн саҕалаан, дьоллоох Дьокуускай куоракка өрөспүүбүлүкэ бары оройуоннарыттан 700-кэ уопсастыбннай үлэҕэ көхтөөх, үөрэхтэригэр саамай кыһамньылаах, эт-хаан өттүнэн тэгиттэн сайдыылаах оҕолор муһуннулар. Кинилэр истэригэр туйгун үөрэнээччилэр, Бүтүн Арассыыйатааҕы олимпиадалар, билим-быраактыка кэмпириэнсийэлэрин кыайыылаахтара, өрөспүүбүлүкэ бастыҥ ыспарсымыаннара.
Тэрийээччилэр кыттааччыларга анаан чаҕылхай бырагырааманы бэлэмнээбиттэрин туһунан үөрэх министиэристибэтэ иһитиннэрэр. Бэҕэһээ, ахсынньы 23 күнүгэр, Ф.И.Авдеева аатынан Оҕо айымньытын дыбарыаһыгар “Биһиги Арассыыйа кэскилэбит” оҕолор гражданскай пуорумнарын үөрүүлээх чааһа буолбута.
Бүгүн, Марфа уонна Сергей Расторгуевтар ааттарынан цииркэҕэ Саҥа дьыллааҕы көрдөрүү буолара күүтүллэр. Үгэс быһыытынан өрөспүүбүлүкэ Аҕа баһылыга Айсен Николаев лауреаттарга бэйэтин анал истипиэндьийэтин туттарыаҕа.
Идэҕэ урутаан бэлэмниир киин педагогтара Ил Дархан Харыйатын кыттыылаахтарыгар маастар-кылаастары тэрийиэхтэрэ.
Маннык улахан дьаһалга биһиги Чурапчыбыт улууһуттан 26 үөрэнээччи кыттыыны ыллыаҕа: Алаҕартан Снежана Струкина, Болугуртан Самсон Иннокентьев, Арыылаахтан Ньургустан Христофоров, Бахсыттан Алеся Аммосова, Болтоҥоттон Владислав Вензель, Хоптоҕоттон Айгыына Посельская, Кытаанахтан Сайыына Лахарева, Мугудайтан Айта Данилова, Одьулуунтан Гульмира Седалищева, Соловьевтан Маркел Николаев, Сылаҥтан Михаил Сивцев, Любовь Михайлова, Төлөйтөн Оксана Смирникова, Хатылыттан Анна Кривошапкина, Хайахсыттан Виктория Борисова, Чакыртан Айсен Егоров, Хадаартан Олеся Орлова, Анна Мордускина, Чурапчы гимназиятыттан Сандаара Керемясова, Уйгулана Гуляева, Алексей Абрамов, Андрей Степанов, Семен Новгородов аатынан Чурапчы орто оскуолатыттан Мария Филиппова, Иван Павлов аатынан Чурапчы орто оскуолатыттан Юлия Андросова, Кристина Дьячковская, интэринээт-оскуолаттан Любовь Кардашевская.
Сэмэн Жендринскэй